Përveç koronavirusit, një sëmundje misterioze është shfaqur teksa ka vrarë 150 persona.
Drejtori i repartit për sëmundje ngjitëse të spitalit Amin Kano, Isa Abubakar, në një deklaratë për Anadolu Agency konfirmoi se në qytetin Kano të Nigerisë nga e premtja deri të dielën kanë humbur jetën 150 persona si pasojë e një sëmundje që ende nuk dihet.
Abubakar tha se shumica e të vdekurve ishin mbi 60 vjeç, prandaj ekziston mundësia që shkaku i vdekjes të jetë edhe koronavirusi.
“Ndoshta bëhet fjalë edhe për ndonjë sëmundje të re, por ajo që është e sigurt është se nuk është normale që në afat kaq të shkurtër të vdesin kaq shumë njerëz”, tha Abubakar.
Në Kano në kuadër të masave kundër përhapjes së koronavirusit të enjten u shpall orë policore shtatë ditëshe, ndërsa në pesë ditët e fundit u konfirmuan 23 raste me koronavirus.
Në Nigeri numri i përgjithshëm i të infektuarve me koronavirus është 665, ndërsa nga fillimi kanë humbur jetën 22 persona.
