Avdullah Hoti do të jetë kandidati që Lidhja Demokratike do i dërgojë presidentit Hashim Thaçi për postin e kryeministrit të Kosovës. Vendimi është marrë sot në kryesinë e partisë dhe është bërë i ditur nga kryetari Isa Mustafa.
“Jemi pajtuar që zotëri Avullah Hoti të propozohet nga kryesia e LDK-së për kryeministër”, ka thënë Mustafa.
Në qeverinë VV-LDK, e cila zgjati vetëm 50 ditë, Hoti mbante postin e zv.kryeministrit, ndërkohë që u shkarkua menjëherë pas votimit të mocionit të mosbesimit në Parlament.
Avdullah Hoti ka qenë kandidat për kryeministër në zgjedhjet paralamentare të vitit 2017-të. Në vitet 2014-2017, ai ka shërbyer si ministër i Financave në qeverinë e drejtuar nga PDK dhe LDK.
Pas rrëzimit të Qeverisë së Albin Kurti, presidenti Thaçi nuk ka vendosur të dërgojë vendin në zgjedhje të parakohshme, por pritet t’i kalojë LDK-së, si partia e dytë më e madhe, kandidaturën për kryeministër.
LDK ka arritur tashmë një marrëveshje me AAK-në e Ramush Haradinajt, AKR-në e Behgjet Pacollit dhe NISMA-n e Fatmir Limajt, për të ndërtuar koalicionin e ri qeverisës. Megjithatë, ky koalicion nuk e realizon dot numrin e nevojshëm për të votuar qeverinë dhe Isa Mustafës i duhet që të arrijë një marrëveshje me Listën Serbe.
