Partia Demokratike i është përgjigjur ironisë së kryeministrit Edi Rama se tani çdokush po kërkon rrogë edhe pse është i papunë, dhe se kreu i selisë blu, Lulzim Basha me përllogaritjet e tij nxjerr 2 milionë të punësuar.
Përmes një postimi në rrjetet e tij sociale, Sekretari i Përgjithshëm i Partisë Demokratike, Gazment Bardhi shkruan se 750 mijë qytetarë nuk kanë përfituar asnjë ndihmë nga planet ekonomike të qeverisë, ndërsa qindra mijëra të tjerë edhe pse të përfshirë në paketa ende nuk e kanë marrë ndihmën e merituar.
Sipas tij, kur Rama qëndron në Surrel, patjetër që është e vështirë të numërohen të varfrit dhe të papunët.
“Kur tabelën e shumëzimit e mëson si Edi Rama, duke llogaritur sa para fiton nga 1 leje ndërtimi, 1 koncesion, 1 tender, 1 pronë në bregdet, sa vota të siguron 1 kg heroinë, e ke mendjen të gënjesh për të mbuluar dështimin. Çdo shifër e dyfishon sipas interesit politik, njësoj si çmimet e tenderave sekret. Punonjësit nuk i fut dot në xhepa si lekët e tenderave dhe as nuk i fsheh dot siç përpiqesh të bësh me dështimet e tua. Sipas INSTAT në Shqipëri ka rreth 974 386 punonjës në sektorin privat bujqësor dhe jo bujqësor. Qeveria ka lënë jashtë ndihmës financiare mbi 750 mijë qytetarë dhe nuk ka shpërndarë ndihmën e premtuar për mijëra të tjerë. Nga Surreli është vështirë të numërosh të varfërit dhe të papunët. Për të provuar dhimbjen e atyre që skanë marrë ende asnjë lek, nuk ka nevojë për makinë llogaritëse. Duhen vetëm sy, vesh dhe përgjegjshmëri në qeverisje,”-shkruan Bardhi.
