Një video që po qarkullon së fundmi në rrjetet sociale ka prekur zemrat e mijëra shqiptarëve. Bëhet fjalë për heroin 103-vjeçar, Shefqet Sulejman Gavoçi. Ai lindi në qytetin e Shkodrës, në vitin 1918.
Gavoçi është djali i katërt i hoxhës Sulejman Gavoçi, i cili ishte luftëtar i dalluar në luftërat kundër turqve që u zhvilluan prej Shkodrës e deri në Tuz. Kjo familje me shumë autoritet në Shkodër, u detyrua ta linte qytetin e dashur pasi ndiqeshin nga mbështetësit e mbretit Zog. Në vitin 1946 ata u vendosën në Damask të Sirisë.
Kur ai u vendos në Siri, qeveria e Enver Hoxhës i hoqi kombësinë shqiptare. Dekada më vonë, në moshën 103-vjeçare Gavoçi ka rifituar kombësinë e tij dhe ka marrë pasaportën shqiptare. Ai nuk e harroi kurrë origjinën e tij dhe thotë me krenari që është shqiptar. Gavoçi është një shembull force për të gjithë ne dhe është një frymëzim për kulturën dhe njerëzit e vendit të tij, pasi nuk u lodh kurrë së ndihmuari popullin e tij përgjatë dekadave të tëra.
