Mospjesëmarrja në votim e Ditmir Bushatit dhe abstenimi i Ilir Beqajt për ndryshimin e objektit të koncesionit të portit në Porto Romano në Durrës ka qenë tema kryesore politike e ditës. Për këtë çështje foli në emisionin ‘Real Story’ edhe Taulant Balla, kryetar i Grupit Parlamentar të Partisë Socialiste.
Fjalimin e ashpër të ish-ministrit të Jashtëm në Kuvend, Balla e konsideroi si “kapsollë boshe”.
“Gjithçka qe tha kolegu im i vjetër Bushati nuk qëndron. Nuk qëndron as në diskutimet për oligarkë dhe oligopole. Nuk ka për të bërë PS-ja koncesione PPP për të rritur kostot për njerëzit. Qasja jonë ka qënë çdo PPP për të ulur kostot. Është një koncesion PPP që ul kostot e shkarkimit në Shqipëri të importeve të hidrokarbureve”, tha Balla.
Duke pretenduar se është më socialist se Ditmir Bushati, Balla tha se “nuk do e kisha votuar unë i pari nëse kjo marrëveshje do të sillte një monpol, përkundrazi shkatërron një monpol”.
“Më vjen keq që padituria ngre balona që i shkojnë përshtat PD-së”, shtoi numri një i socialistëve në Parlament.
I pyetur edhe për abstenimin e Ilir Beqajt, ish-ministër i Shëndetësisë, Balla shpjegoi: “(Beqaj) Është treguar më korrekt sepse ka komunikuar me mua dhe kemi patur diskutime për sqarimin e kësaj çështjeje. Zoti Beqaj e ka patur me të drejtën ose jo për ndryshimin e objektit të një kontrate që është në vijim të koncesionit.”
– Debati për Porto Romanon/ Balluku padit Gjatën, por kursen Bushatin
