Në një skenar hipotetik që po mendohet nga qeveria shqiptare, ekziston mundësia për “fshirjen” totale të pjesës së mbetur të kalendarit të Superiores. Por, nëse për caktimin e kampiones, dhe ekipeve që shkojnë në Europë, e atyre që zbresin, logjika është disi e drejtë, skuadrat duhet të mendojnë edhe për humbjet nga shitja e biletave, markat dhe produktet zyrtare, zhvlerësimi i lojtarëve e sigurisht e drejta televizive.
Me 19 mijë shikues në ‘Air Albania’ në derbin e zhvilluar ndaj bardhebluve në muajin Dhjetor, 200 milionë Lekë fitoi Partizani nga biletat. Ky është një shembull i qartë sesi ekipet e kryeqytetit do të privohen nga miliona, nëse Liga mbyllet në Maj.
Nëse vjen mbyllja e parakohshme e sezonit futbollistik në Shqipëri, Tirana do të marrë lekët e titullit nga FSHF por do ketë dëme të mëdha sepse në 100 vjetorin e themelimit, me më shumë entuziazëm se kurrë dhe me pikaverazhin komod që i jep hendekun në krye, nuk do shfrytëzonte biletat, dhe prodhimin e simboleve nga kompania Macron.
Sfidat në “Air Albania” kanë sjellë përfitime të majme për presidentin Refik Halili që vazhdon të kontestohet nga tifozët.
Bardheblutë llogarisnin të luanin dhe 3 ndeshje në impiantin në kryeqytet, të cilin e zgjodhën pas një sondazhi thuajse fals në rrjete sociale, me vetëdijen se më mirë i paracaktuar, stadiumi do sillte më shumë para. Tirana priste 600 milionë Lekë nga sfida si Tirana-Vllaznia, Tirana-Kukësi dhe Tirana-Bylis, ndeshja e fundit dhe festa e pritshme.
Situatë e njëjtë edhe për Partizanin që ndërkohë, “shterohet” financiarisht nga shpenzimet për kompleksin e ri të mbështetur fort nga presidenti Demi, por jo FSHF.
