Youtube ka vendosur që të mbyllë kanalin e konspiracionistit britanik, David Icke, pas publikimeve që ai ka bërë mbi pandeminë e koronavirusit. Kanali që kishte mbi 900 mijë ndjekës u mbyll me argumentin se Icke kishte shpërndarë dezinformacione mbi COVID-19.
Vendimi i Youtube erdhi pas atij të Facebook, i cili gjithashtu mbylli faqen zyrtare të konspiracionistit. Në videon e fundit, Icke fliste pikërisht për vendimin e marrë nga kompania e Mark Zuckerberg.
David Icke ka qëndrimin se pandemia e koronavirusit është shpërndarë kryesisht nga rrjeti gjeneratës së 5-të të teknologjisë (5G), teori konspirative që ka gjetur shumë mbështetës anë e mbanë botës.
“YouTube ka politika të qarta që ndalojnë çdo përmbajtje që kundërshton ekzistencën dhe transmetimin e Covid-19 siç e përshkruan OBSH”, tha për BBC një zëdhënës i Youtube.
Pretendimi se koronavirusi është shkaktuar nga 5G ka sjellë shumë sulme ndaj antenave të kompanive telefonike në Britani, SHBA dhe shtete të tjera.
