-UT në kaos/ Dekanët i “grisin” vendimin rektorit Koni
Anëtari i shkarkuar i KIZ-it (Komisioni Institucional Zgjedhor), tregon përplasjet institucionale me rektorin Mynyr Koni. Doka: Për datën e zgjedhjeve vendos Ministria e Arsimit, ne do të vijojmë punën për të mos e future në kolaps Universitetin e Tiranës.
“Vendimi i Rektorit të Universitetit të Tiranës për largimin e menjëhershëm nga puna të anëtarëve të KIZ-it është i kundërligjshëm”. Kështu u shpreh në një intervistë për gazetën “Fjala” anëtari i Komisionit Institucional Zgjedhor, Ardian Doka, njëkohësisht pedagog pranë departamentit të Gjuhësisë, në Fakultetin e Historisë dhe të Filologjisë. Sipas pedagogut Doka, vendimi i Rektorit Koni është i atakueshëm në përmbajtje dhe në procedurë. Për sa i përket vazhdimit të procedurave të regjistrimit të kandidatëve për zgjedhjet e autoriteteve drejtuese dhe anëtarëve të Senatit Akademik të Universitetit të Tiranës, Doka theksoi se KIZ-i do të vijojë punën deri në përfundimin e afateve, ashtu siç e parashikon rregullorja.
Ju keni marrë një shkresë nga Rektorati i Universitetit të Tiranës ku jeni njohur me zgjidhjen e menjëhershme të kontratës së punës. Sipas Rektorit të UT, Mynyr Koni, ju si ish-anëtarë të Komisionit Institucional të Zgjedhjeve, në mënyrë të paligjshme keni hapur procedurat e regjistrimit të kandidatëve dhe keni prodhuar dokumente shkresore për fillimin e procesit zgjedhor në universitete. Si e konsideroni këtë vendim?
Vendimi i Rektorit të Universitetit të Tiranës është i kundërligjshëm. Sipas ligjit për arsimin e lartë, neni 68 paragrafi 2 ‘Largimi nga detyra I personelit Akademik të IAL-së bëhet nga rektori i institucionit me propozimin e drejtuesit të njësisë bazë, ku personeli akademik zhvillon veprimtarinë e tij dhe pas miratimit të Komisionit ad-hoc të ngritur nga Senati Akademik në rastet e shkeljeve të rënda dhe të përsëritura të ligjit, sipas përcaktimit të statutit.’ Në rastin e zgjidhjes së menjëhershme të kontratës së punës të vendosur nga rektori Koni për pesë nga anëtarët e KIZ-it është shkelur jo vetëm përmbajtja e asaj që parakupton ligji dhe statuti, por edhe procedura formale për dhënien e një mase të tillë. Për asnjërin nga ne nuk ka propozim nga ana e ndonjërit prej përgjegjësve të njësive bazë, pranë të cilave ne ushtrojmë veprimtarinë tonë si pedagogë. Po ashtu, për asnjërin nga ne nuk është dhënë ndonjë masë disiplinore për mangësi në ushtrimin e detyrës. Nga ana tjetër, si anëtarë të një komisioni të zgjedhur nga Senati, rektori Koni nuk mund të na shkarkojë, sepse KIZ nuk varet nga rektori, por nga Senati. Lidhur me argumentin se neve n aka mbaruar mandate, dua t’I kujtoj rektoritse edhe mandati i tij është gjithashtu 4-vjeçar. Në këto kushte masa e marrë prej rektorit Koni i bie ndesh përmbajtjes së ligjit dhe procedurës.
Si do të procedoni në vazhdimësi?
Pyetja juaj ka dy anë, dhe unë do të përgjigjem në fillim për atë që quaj më të rëndësishme. KIZ-i do të vijojë punën duke ushtruar përgjegjësitë e veta, deri në përfundimin e procedurave të procesit zgjedhor. Lidhur me aspektin e dytë që ka të bëjë me ndërprerjen e menjëhershme të kontratës së punës, me sa di unë, shkresa e Rektorit ka mbërritur nëpër fakultete dhe përgjegjësit e njësive kryesore do ti përgjigjen institucionalisht duke refuzuar ta zbatojnë vendimin.
Kohët e fundit ka pasur debate nga autoritete të ndryshme përsa I përket zgjedhjeve, a ka patur një vendim të rektorit për shtyrjen e tyre?
Sipas ligjit për Arsimin e Lartë, Statutit të Universitetit të Tiranës dhe rregullores për organizimin e zgjedhjeve të miratuar më 10 Shkurt 2020 nga Senati I Universitetit Të Tiranës, për hartimin e draftit të së cilës kanë punuar po këta pedagogë që Rektori Koni I shkarkon në mënyrë të kundërligjshme, Rektori i IAL-së nuk ka tagër t’i shtyjë zgjedhjet ose t’i pezullojë. Sipas kuadrit ligjor në fuqi datën e zgjedhjeve e vendos Ministri i Arsimit, Rektori shpall vendimin e saj dhe ngarkon organet kompetente KIZ dhe KZF për organizimin e zgjedhjeve. Nuk është në kompetencat e KIZ të vendosë mbajtjen ose jo të zgjedhjeve. KIZ vepron mbi bazën e urdhërit të Ministrit të Arsimit dhe të shpalljes së tij nga ana e Rektorit të Universitetit të Tiranës.
Si e shikoni mundësinë e zhvillimit të këtyre zgjedhjeve në një situatë kur vendi ende nuk ka dalë nga fatëkeqësia natyrore?
E përsëris KIZ nuk vendos për mbajtjen ose jo të zgjedhjeve por është I detyruar në bazë të ligjit dhe të rregullores së zgjedhjeve të marrë të gjitha masat e nevojshme, duke filluar që nga hapja e procedurave për regjistrimin e kandidatëve deri në miratimin e listave zgjedhore. Lidhur me datën është Ministria e Arsimit ajo që vendos.
Mandati I KIZ prej mesit të muajit shkurt ka përfunduar, pse nuk janë realizuar ende zgjedhjet për të përcaktuar anëtarët e Komisionit Institucional të Zgjedhjeve?
Është e vërtetë që formalisht mandati I anëtarëve të Komisionit Institucional Zgjedhor ka përfunduar, ashtu siç përfundon pas disa ditësh mandati I Rektorit dhe mandate I të gjitha autoriteteve drejtuese në UT. Në një situatë normale duke ndjekur procedurën e përcaktuar në ligj dhe rregullore, Rektori I Universitetit të Tiranës duhet të kishte hapur garën për të konstituar KIZ-in e ri. Ashtu siç ka ndodhur në dijeninë time në pjesën më të madhe të universiteteve publike, por rektori Koni vendosi të sillet në mënyrë jo institucionale. Nuk ndërmori asnjë veprim për ta mbajtur situatën në UT në binarët e ligjshmërisë. Kjo nuk mund të shpjegohet sipas meje vetëm me gjendjen e jashtëzakonshme. Prej datës 10 shkurt deri në datën 9 mars, rektori Koni kishte të gjithë kohën e nevojshme për ta mbajtur procesin zgjedhor në UT në binarët e normalitetit. Ai zgjodhi të bllokojëprocesin. Së fundi, sjelljen e tij joinstitucionale e të kundërligjshme vendosi t’ua faturojë anëtarëve të KIZ-it.
