34-vjeçari i arrestuar ditën e sotme, pasi tentoi të vidhte një motomjet, Edison Canaj është shumë i njohur për drejtësinë shqiptare për një sërë të veprash penale.
Canaj u bë i njohur, pasi u lirua nga burgu nga një SMS që familja e tij i dërgoi Kryeministrit Sali Berisha. Familja e 34-vjeçarit i dërgoi një mesazh Berishës ku i kërkonin që të lironte Edisonin, pasi sipas tyre ishte i pafajshëm.
Lajmi se nëna e të burgosurit i kishte dërguar SMS Berishës u konfirmua nga ajo vetë për mediat në atë kohë, e cila tregoi se pasi kishte marrë përgjigje negative nga autoritetet e burgjeve dhe prokuroria për lirimin e të birit iu drejtua mediave dhe më pas, vetë zyrës së kryeministrisë me dy mesazhe celulari në numrat e ankesave për publikun. “Pasi ia sqarova në SMS kryeministrit problemin tim, më mori në telefon një punonjës i kryeministrisë dhe më sqaroi se im bir do lirohej nga qelia, brenda dy ditësh”, -pohoi Lavdie Canaj duke shtuar se kështu kishte ngjarë në të vërtetë.
Ndërsa në 12 korrik të 2013 ai u arrestua sërish, por këtë herë së bashku me Ermal Mrrukun për pengmarrje dhe vetëgjyqësi ndaj shtetasit Rigert Bilali. Si fillim ai u dënua me 3.8 vite burg për vrasjen e mbetur në tentativë të Bilalit. Ndërsa në maj të 2014-ës Canaj është dënuar me 2.4 vite burg.
Edisoni njihet për vjedhje të shumta dhe arrestime të herë pas hershme për vepra të ndryshme penale. Ndërsa, ditën e sotme ai ka rënë përsëri në pranga, pasi nga informacionet e marra nga policia u bë me dije se do kryente një tjetër vjedhje.
Canaj ishte shpallur në kërkim nga Komisariati i Policisë Nr. 6, pasi Gjykata e Rrethit Gjyqësor Tiranë i ka caktuar masën e sigurimit “Arrest në burg”, për veprën penale “Vjedhja me dhunë”. Duket se Edison Canaj është nga ata persona që nuk di të ndalet, ndonëse e ka provuar për herë me radhë burgosjen./Fjala.al/
