Zgjati vetëm 3 muaj aventura e talentit Idelino Gomes nga skuadra e futbollit shqiptar Teuta. “Djemtë e Detit” në krizë ashtu si të gjithë “simotrat” në Superligë, i dha duart një bomberi që erdhi me bujë dhe me premtimin për të bërë diferencën, por u la jashtë në rastin më të parë.
Pasi mori një dorë të mirë parash dhe e kaloi karantinën buzë Atlantikut Verior në qytezën e Cachungo, Idelino Gomes nuk pranoi të rikthehet në Durrës. Ai udhëzoi agjentin që të gjejë gjuhën e përbashkët me Teutën, e cila pranoi ti japë kartonin për të lejuar shitjen në merkaton e verës, kundrejt premtimit “e bardha mbi të zezë” se nuk do të ketë pretendime ndaj bregdetarëve.
Sulmuesi Idelino Gomes me 204 centimetrat e tij, kishte zbarkuar me shumë premtime për gola nga skuadra e Lincoln, kampionët e Gjibraltarit por u zbulua “një flluskë” dhe nuk do të endet më në fushat e Superligës shqiptare, të paktën në një të ardhme të afërt.
