Në emisionin “Open” në Top Channel, kryetari i Bashkisë së Tiranës, Erion Veliaj foli për Teatrin Kombëtar duke sulmuar presidentin Ilir Meta për qëndrimin që ka mbajtur për këtë çështje.
“Presidenti ka dorëzuar një padi nul, duhet të gjejë një këshilltar ligjor dhe jo të bëhet barsaletë ligjore. Po bëhet gaz i botës, juristët po qeshin nëpër Tiranë. Nuk mund të budallepset e gjithë Tirana se bën gafa një institucion. Ai ka dorëzuar një padi nul, sepse nuk ekziston më ai ligj”, tha Veliaj.
Veliaj tha se Bashkia e Tiranës ka qenë transparente me projektin e ndërtimit të Teatrit të ri Kombëtar.
“Ne kemi qenë transparent me projektin. Kemi thënë që plani i parë është ta ndërtojmë me lekët e privatit, që nuk ramë dakord pasi privati nuk ofronte aq sa kërkonin aktorët. Plani i dytë është ta ndëtojmë me lekët e tona, por që nuk i kemi dhe kalojmë tek plani i tretë që marrim kredi dhe ndërtojmë teatrin. Duhej të kalonte në pronësi të Bashkisë së Tiranës sepse ndërtimi do të bëhet nga e para dhe është Bashkia e Tiranës që do të marrë kredinë”, tha Veliaj.
