“Arrest me burg” ka dhënë gjykata e Beratit për 37-vjeçarin Hamza Çela, që pak ditë më parë masakroi për vdekje të afërmin e tij Ramadan Çela.
Bëhet fjalë për ngjarjen e ndodhur në Jaupas të Skraparit, ku 77-vjeçari u godit disa herë me thikë.
Shkak dyshohet të jetë bërë një çështje pronësie, ndërsa në momentin e krimit nuk ka pasur dëshmitarë.
Familjarët e Hamza Çelës kanë insistuar se ai ka probleme me shëndetin mendor por nuk rezulton të ketë raport mjekësor nga Spitali Psikiatrik i Vlorës.
Hamza Çela vrau të afërmin dhe komshiun e tij të moshuar Ramadan Çelën në mënyrë makabre, duke e qëlluar me thikë në kokë, damarë e zemër.
Çela, që prej vitesh jetonte në qytetin e Poliçanit, ishte kthyer në shtëpinë e vjetër që kishte në fshatin Jaupas për t’u marrë me tokat bujqësore, por duke vaditur tokat e mbjella me domate ai u qëllua nga prapa me thikë nga 37-vjeçari.
Autori shëtiti me thikë në dorë dhe me bluzën e lyer me gjak nëpër fshat u kap nga policia gjysëm ore pas vrasjes,në përpjekje për t’u larguar nga fshati.
