Kryetari i Gjykatës së Lartë Ardian Dvorani,ka reaguar në lidhje me veprimtarinë e këtij institucioni, pas emërimeve të anëtarëve të rinj.
Në një deklaratë për mediat ai tha se me emërimin e 3 gjyqtarëve të rinj, Gjykatës së Lartë i është rikthyer pjesërisht funksionaliteti, ndaj sipas Dvoranit ka filluar dhe po vijon me intensitet punën për shqyrtimin e çështjeve.
Deklarata e plotë
“Këto ditë dhe pa vonesë do të bëhen publike dhe do të vihen në zbatim të gjitha objektivat e këtij bashkëpunimi. Gjykata e Lartë prej kohësh ka kryer punë përgatitore dhe ka marrë masa për të mundësuar funksionimin e saj me të gjitha kapacitetet e mundshme.
Tashmë me emërimin e 3 gjyqtarëve të rinj Gjykatës së Lartë i është rikthyer pjesërisht funksionaliteti, ndaj ka filluar dhe po vijon me intensitet punën për shqyrtimin e çëajtjeve.
Ndërkohë jemi të vendosur dhe të angazhuar që së bashku me KLGJ, JFA, EURALIUS dhe institucione të tjera ndërkombëtare, të marrim dhe të zbatojmë çdo masë që i shërben jo vetëm cilësisë së dhënies së drejtësisë por edhe përshpejtimit dhe rritjes së numrit të çështjeve që prej vitesh presim të shqyrtohen”./Fjala.al/
