Shtetet e Bashkuara kanë akuzuar sërish Kinën që janë duke vjedhur kërkimet për vaksinën e koronavirusit.
Në një deklaratë për shtyp, Sekretari amerikan i Shtetit Mike Pompeo ka dënuar përpjekjet “e aktorëve kibernetikë dhe operatorëve jo-tradicionalë që kanë lidhje” me Kinën se po tentojnë të vjedhin pronën intelektuale dhe të dhënat që lidhen me Covid-19.
“Shtetet e Bashkuara i bëjnë thirrje Republikës Popullore të Kinës të ndalë këtë veprimtari keqbërëse. Siç thuhet në shënimin paralajmërues të 13 majit, ‘aktiviteti që mund të ketë rezultuar në vjedhje informacioni vë në rrezik identifikimin e opsioneve të mirëfillta kuruese’. Sjellja e Kinës në hapësirën kibernetike është një tjetër reflektim i veprimeve joproduktive gjatë krizës së koronavirusit. SHBA dhe aleatët e partnerët tanë po bashkërendojnë një përgjigje të përbashkët, transparente për të shpëtuar jetë. Ndërkohë Kina vazhdon t’u mbyllë gojën gazetarëve, shkencëtarëve dhe qytetarëve dhe të përhapë dezinformim, gjë që acaron krizën e shëndetit publik,” tha Sekretari Pompeo, në një deklaratë të publikuar në faqen elektronike të Departamentit të Shtetit./Fjala.al/
