Akademiku Artan Fuga sheh ndryshimin e sistemit zgjedhor dhe listat e hapura si të vetmen zgjidhje për t’i dhënë qytetarëve pushtet në Shqipëri. Edhe një herë tjetër, Fuga thekson se opozita duhet të bëjë autokritikë të thellë, si dhe të emancipojë programin politik nëse nuk do që edhe rezistenca për teatrin e shembur të shkojë dëm.
“Ca duhet të lënë patetizmat uluritëse, autizmin, vetëlegjitimimin, u duket se janë mesi dhe vetëm ata janë heronjtë, duke e lënë rehat procesin e emancipimit politik, ose të kontribuojnë si ushtarë modestë për të! Teatri u shemb. Krimi u bë. Rrezistenca fatkeqësisht dështoi. Tani luftra dhe beteja emancipuese ka nevojë të ndërmerren”, shkruan Fuga.
Dhunën ndaj qytetarëve, akademiku e sheh si pasojë e mungesës së shtetit ligjor, mungesës së legjitimitetit si qytetarë pa status juridik.
“Shihni teatrin te Pallati i Kongreseve për të kuptuar se themelet e kulturës dhe artit të çliruar nga politika nuk mund të ngrihen nëse populli nuk ka të drejtë të zgjedhë përfaqësuesit e vet! Mjaft me ulërima histerike që na fshehin thelbin ku po humbim gjithçka, po humbim veten”, shprehet Fuga.
Pavarësisht thirrjes së vazhdueshme nga akademikë dhe shoqëria civile për ndryshimin e sistemit zgjedhor dhe hapjen e listave, Partia Demokratike nuk i ka dhënë ende mbështetje këtij propozimi.
Reagimi i plotë i Artan Fugës
Nëse opozita nuk emancipon programin politik për vetëadministrimin e institucioneve kultrore, artistike, mediatike publike, (teatri, opera, ansambli, radiotelevizioni, muzetë, institucionet shkencore, INSTAT, etj.) duke parashikuar depolitizimin e plotë të tyre, pra duke bërë edhe autokritikën e vet të thellë, edhe rrezistenca për teatrin tashmë të shembur, do të shkojë për lesh sikurse shkoi!
Madje do të shkojë për lesh edhe inteligjencia krijuese artistike duke mbushur radhët e të papunëve, të pijetoreve, ose të emigrantëve.
Ca duhet të lënë patetizmat uluritëse, autizmin, vetëlegjitimimin, u duket se janë mesi dhe vetëm ata janë heronjtë, duke e lënë rehat procesin e emancipimit politik, ose të kontribuojnë si ushtarë modestë për të!
Teatri u shemb. Krimi u bë. Rrezistenca fatkeqësisht dështoi. Tani luftra dhe beteja emancipuese ka nevojë të ndërmerren.
Mjaft me kundrasense, edhe do e mbrojmë trup më trup e gjak më gjak teatrin, edhe pse na ushtruan dhunë!
Dhunë sepse jemi pa të drejta qytetare, se nuk kemi shtet ligjor, sepse nuk kemi legjitimitet si qytetar pa status juridike. Pa këto do të na rrahin e do të na shkepin madje!
Cfarë ekspertësh doni! Pse pak ekspertë shërbëtorë ka? Cfarë gjykate kushtetuese doni? Gjykata kushtetuese është me shumicë nga partia në pushtet! Cfarë kërkoni nga populli, të bëhet guerrilas profesionist??? Lëreni mo qytetarin rehat. Ai rreziston mijra herë më mirë sesa ne në format e tij, por ne na duket se rrezistenca jemi ne, sikurse i duket atij se shteti është ai§ Cfarë simetrie e çmendur! Vajte ti te minatorët, po te studentët, po te naftëtarët, po te pedagogët, po te astiriasit – veçse për të larë gojën -, cfarë legjitimiteti kemi më shumë ne sesa ata që nënshkruan peticionin e qelbur të shkatërrimit të teatrit – dhe tani thonë se nuk e kemi nënshkruar – (shërbëtorë të ndyrë të selinizuar).
Mjaft me rrezistencat trup më trup rrugëve që mbarojnë si shashka!
Shihni teatrin te Pallati i Kongreseve për të kuptuar se themelet e kulturës dhe artit të cliruar nga politika nuk mund të ngrihen nëse populli nuk ka të drejtë të zgjedhë përfaqësuesit e vet!
Mjaft me ulurima histerike që na fshehin thelbin ku po humbim gjithçka, po humbim veten.
