Ministri i Jashtëm Gent Cakaj përmes një postimi në rrjetet sociale ka bërë të ditur mbajtjen e Konferencës së Nivelit të Lartë të Selanikut.
Konferenca është zhvilluar online, me pjesëmarrjen e të gjithë ministrave të jashtëm të rajonit, disa vendeve anëtare të BE-së dhe përfaqësuesve të lartë të Komisionit Evropian.
Sipas Cakajt, diskutimi i procesit të rihapjes graduale të kufijve, rimëkëmbja ekonomike dhe përpjekjet për frenimin e përhapjes së koronavirusit ishin temat më të rëndësishme.
Cakaj shpreh bindjen se bashkëpunimi rajonal dhe bashkëpunimi me BE-në janë themelorë në luftën e përbashkët kundër pandemisë.
Postimi i plotë
Sot u mbajt Konferenca e Nivelit të Lartë e Selanikut me pjesëmarrjen e të gjithë ministrave të jashtëm të rajonit, disa vendeve anëtare të BE-së dhe përfaqësueseve të lartë të Komisionit Evropian.
Zhvilluam një bisedë shumë të vyer për të bashkërenduar veprimet tona në procesin e rihapjes graduale të kufijve, rimëkëmbjes ekonomike dhe përpjekjeve të përbashkëta për të frenuar përhapjen e COVID-19.
Të gjithë njëzëri u pajtuam për të shtuar bashkëpunimin në fushën e shëndetësisë, agrikulturës, turizmit, transportit dhe ndërlidhjes.
Bashkëpunimi rajonal dhe bashkëpunimi me BE-në janë themelorë në luftën e përbashkët kundër pandemisë.
