Kanë dalë para gjykatës 4 nga 7 personat e proceduar nga Policia e Shtetit për protestën që zhvilluan pas shembjes së Teatrit Kombëtar.
Ata pritet të njihen sot me masën e sigurisë, ndërsa seanca ka filluar në orën 11:00. Të ndaluarit që do njihen sot me vendimin e gjykatës janë:
Ermal Shkalla
Sabri Mekollari
Xhevdet Nela
Pjetër Hasaj
Rikujtojmë se ata janë 4 nga 7 të ndaluarit e ditës së dielë, ku policia u përplas me protestuesit që kundërshtuan shembjen e godinës së Teatrit Kombëtar.
Rikujtojmë se bashkë me ta është ndaluar edhe kryetari i lëvizjes Vetëvendosje në Shqipëri, Boiken Abazi, i cili duket se do të dalë para gjykatës në një seancë tjetër. Ndërsa, Aleanca për Mbrojtjen e Teatrit ka bërë thirrje që qytetarët të dalin në solidaritet të të ndaluarve tek dera e gjykatës.
“Sot dalin në gjyq disa nga protestuesit për mbrojtjen e Teatrit që u ndaluan nga policia më 17 maj. Në orën 11 qytetarët janë të ftuar të jenë në derën e Gjykatës.”,-bën me dije Aleanca për Mbrojtjen e Teatrit.
Rikutojmë se ditën e nesërme është thërritur një protestë tjetër që do të zhvillohet në orën 17:30./Fjala.al/
