Kryeministri në detyrë i Kosovës, Albin Kurti ka thënë se është gati që të rifillojë bisedimet me Serbin, të ndërmjetësuara këto nga Brukseli.
Në një vizitë te prodhuesit vendorë në Suharekë, ai ka thënë se është në kontakt të vazhdueshëm me të dërguarin e posaçëm të Bashkimit Evropian për dialogun Kosovë-Serbi, Mirosllav Lajçak dhe se ai është duke përgatitur fillimin e dialogut.
“Ne kërkojmë që ky dialog të jetë me parime dhe i përgatitur, i organizuar mirë. Jemi gati, kemi përvojë, do t’i mbrojmë interesat e shtetit tonë dhe do ta përfaqësojmë Republikën e Kosovës ashtu siç e thotë Kushtetuta, ashtu siç e thonë ligjet tona dhe ashtu siç na njeh populli i Kosovës”, -tha Kurti.
Ndërsa porsa i përket kohës kur do të mund të rifillojë ky dialog, Kurti tha se kjo gjë është në dorën e Brukselit.
“Pra varet prej Brukselit, kalendari i dialogut të ardhshëm dhe në bazë të Kushtetutës së Republikës së Kosovës dhe aktgjykimit nga viti i kaluar, Kosovën e përfaqëson kryeministri i saj”,-u shpreh ndër të tjera Albin Kurti.
Momentalisht dialogu mes këtyre dy vendeve është pezulluar që nga momenti kur autoritetet e Kosovës vendosën 100% taksë në importet e Serbisë dhe Bosnje-Hercegovinës.k.t/Fjala.al/
