Kreu i shtetit, Ilir Meta, nis aksionin politik, thërret liderët e opozitës në takim për të diskutuar mbi situatën që po kalon vendi pas shembjes së godinës të Teatrit Kombëtar. Detyra e vështirë e Metës për të luftuar në dy fronte dhe busulla që do t’i japë opozitës
Nga Sebi Alla
Presidenti Ilir Meta po e nis aty ku e la, në vijimin e një “ëndrre” me sheshin plot, si në tubimin e 2 marsit, marshimi i të cilit ndali për shkak të koronavirusit. Datat ndryshojnë, qëndrimet jo, kauzat gjithashtu mbeten po ato, shtuar edhe prishja e Teatrit Kombëtar. Në këtë vazhdë, bashkë me Kushtetutën në “dorë”, Meta ka edhe çështjen e Tetarit Kombëtar dhe ditën e sotme, në orën 09:30 ka thirrur në takim partitë opozitare, PD-në dhe aleatët e saj.
Sipas burimeve të siguruara nga gazeta “Fjala”, tema e diskutimit lidhet me situatën aktuale pas prishjes së objektit të teatrit, i cili ka nxitur protesta të artistëve, të mbështetur nga një numër i vogël i drejtuesve politikë të partive opozitare që mbushin platenë e rrugës si spektatorë, duke u munduar të kapin një “kauzë të dhuruar”. Por duket se për Metën kaq sa po bën opozita nuk mjafton, atij po i rri ngushtë “kostumi i presidentit, ndaj lëvizja e tij, me gjasë, do ta tërheqë opozitën në aksione të qenësishme, për atë që e quan reagim në “mbrojtje të demokracisë”.
Sinjalet u dhanë dy ditë më parë.
“Të gjithë u ndien edhe në faj edhe në borxh me heronjtë dhe heroinat që e mbrojtën atë për dy vjet e gjysmë me sakrifica të patreguara dhe nën presione të gjithanshme. Tani kauza e tyre është e të gjithëve ne, dhe nuk do të ndalojë deri në shembjen e tiranisë dhe rindërtimin e Teatrit. Mirënjohje të përjetshme artistëve të cilët zgjuan qytetarinë. Një popull që fle në demokraci zgjohet në diktaturë. A nuk u zgjuam në diktaturë në mes të errësirës më 17 maj?”- këtë konstatim dhe pikëpyetje ngre kreu i shtetit në një nga postimet e fundit, duke paralajmëruar se çështja “teatri”, nuk mbyllet vetëm me një fadromë që rrënoi një godinë, pasi “shfaqja me protesta” për të dobësuar qeverinë, do ketë “aktorë” të tjerë, tashmë politikë.
A po bind opozita?!
Në një situatë konflikti, pas një vendimi të qeverisë qendrore dhe asaj vendore për prishjen e godinës së Teatrit Kombëtar, shigjetat janë nisur drejt mazhorancës në pushtet, e cila në këto momente po pret venitjen e protestave, deri në shuarjen e tyre. Nga ana tjetër, opozita ka shkarë fort. Si fillim, liderët e saj premtuan se nuk do ta lejonin kurrë prishjen e godinës së Tetarit Kombëtar, madje, me deklarata të forta si: “Do ta mbrojmë me trupat tanë”. Gjithashtu, edhe kreu i PD-së, Lulzim Basha, u shpreh që nëse shkatërrimi i objektit do të ndodhte, kjo do të ishte vija e kuqe për Rëmën. Gjithçka ndodhi. Me “forcë” opozita nuk e mbrojti teatrin dhe “vija e kuqe” u shkel. Premtimet edhe në opozitë shpesh janë të rëndësishme, mbase më të rëndësishme se ato që bëhen kur je në pushtet. Kjo lloj apatie dhe mungese e koherencës mbi atë që deklarojnë dhe asaj që realizojnë, e shqetësoi elektoratin opozitar, i cili po kërkon një “riorganizim”. Nismën për momentin e ka marrë kreu i shtetit, Ilir Meta. Ky do të jetë edhe qëllimi i takimit të sotëm, ku në një lloj mënyre presidenti po “orienton” opozitën për mënyrën se si duhet të bëjë opozitë…
E ardhmja, jo vetëm si lojë nervash
Shembja e godinës së Teatrit Kombëtar mund të jetë edhe “gongu” i nisjes së fushatës elektorale për zgjedhjet e ardhshme parlamentare. Qëllimi i opozitës mbetet shkurtimi i ditëve të qeverisë, por disa kauza, edhe kur ia ofrojnë të tjerët (siç ishte çështja e Tetarit Kombëtar), Basha nuk po i shfrytëzon. Një opozitë denoncuese, por për momentin jo frymëzuese dhe reaguese, shihet me shqetësim nga kreu i shtetit, i cili në këtë rast ka dy misione politike dhe personale për të kryer. Së pari, nuk duhet ta humbasë kauzën e “mbrojtjes së Kushtetutës”, veçanërisht atë të krijimit të Gjykatës Kushtetuese dhe, nga ana tjetër, të bëjë opozitarizëm, gati klasik, por duke mbajtur staturën e kreut të shtetit. Tubimi i 2 marsit që ishte masiv dhe kauzat që Meta ngriti vetëm me një thirrje nga “institucioni honorifik” (siç konsiderohet presidenca) mbetet shumë domethënës. Presidenti, megjithatë, u anatemua kur në kohën e kulmit të pandemisë së koronavirusit takoi kryeministrin Rama dhe më pas dekretoi ndryshimet në Kodin Penal për shkelësit e rregullave të karantinës. “Me vendosjen e situatës së jashtëzakonshme, për shkak të kësaj fatkeqësie, siç është kjo pandemi, pa dyshim që përballimi në një mënyrë sa më mbarëvajtëse dhe bashkëpunuese të kësaj situate ka qenë dhe mbetet detyra kryesore e të gjithëve, mendoj unë, jo vetëm e presidentit, jo vetëm e qeverisë, që pa dyshim ka dhe më shumë detyra, duke përfaqësuar tërësisht ekzekutivin, por edhe e të gjithë opozitës dhe e të gjitha grupeve të interesit, gjithë qytetarëve, kështu që sjelljet e mia duhen parë në këtë kontekst”- tha Meta në një intervistë për Roland Qafokun në emisionin “Hard Talk”. Por paqja e përkohshme tashmë duket e kapërcyer, për t’i kthyer palët sërish aty ku ishin. Kjo situatë i shkoi përshtat më shumë Metës, që do të ketë një rast për t’i shuar zërat që e akuzuan për marrëveshje me Ramën, por edhe që t’i tregojë opozitës udhën nga duhet të kalojë./Fjala.al
