Nisur nga një propozim i amerikanëve për të aplikuar në Shqipëri sistemin zgjedhor danez me lista të hapura, në Kuvend janë deputetët e opozitës që po kërkojnë hapjen e debatit për këtë çështje. Deputeti Halit Valteri, pjesë e Grupit Parlamentar Demokrat, tha se është pro një sistemi me lista të hapura kandidatësh, ashtu siç ndodh në shumicën e shteteve të BE-së.
“Një prej këtyre arsyeve është se ky sistem është demokratik dhe i siguron qytetarëve që të votojnë kandidatin e preferuar. Përparësi tjetër është se zvogëlon centralizimin e partisë. Ne duhet të luftojmë konceptin e njëshit të partive, që i jep qytetarëve të drejtën të votojnë të lirë dhe të zgjedhë kandidatin e preferuar”, tha Valteri.
Më tej, deputeti shtroi pyetjen: “Pse në Shqipëri PD-PS-LSI kanë frikë nga ndryshimi i sistemit? Opinioni opublik e ka humbur besimin te sistemi dhe te ju.”
Valteri tha se “unë besoj te listat e hapura sepse asnjë bandit nuk është kombëtar. Askush nuk mund ta blejë gjithë SHqipërinë”.
Halit Valteri kritikoi edhe katër pjesëmarrësit në tryezën e Këshillit Politik: Damian Gjiknuri, Oerd Bylykbashi, Petrit Vasili dhe Rudina Hajdari.
“Këta të 4 as administrator pallatesh nuk bëjnë, kanë hallin e vetting-ut, të tenderave, nuk është halli i tyre ndryshimi i sistemit zgjedhor”, tha Valteri.
