Ministri i Brendshëm, Sandër Lleshaj ishte sot i pranishëm në pikën kufitare të Kakavijës, ku ndër të tjera është pyetur nga gazetarët edhe për gjobat që po i vihen shqiptarëve që kthehen nga Greqia dhe që kanë tejkaluar afatin për shkak të pandemisë së koronavirusit.
Lleshaj përsëriti premtimin e kryeministrin Edi Rama se nëse nuk do e bëjë Greqia subvencionin, atë do e marrë përsipër qeveria shqiptare.
“Qeveria është në kontakte të ngushta me qeverinë greke, subvencioni do të ndodh. Edhe nëse qeveria greke nuk do të gjejë mundësinë për të adresuar këtë çështje, do e bëjë qeveria shqiptare”, tha Lleshaj.
Pas një bisede telefonike të zhvilluar disa javë më parë midis Ramës dhe homologut Kyriakos Mitsotakis, u deklarua se shqiptarët e bllokuar në Greqi nuk do të gjobiteshin, por sot po ndodh e kundërta. Përveç gjobës që shkon deri në 600 euro, shqiptarëve po u vendoset edhe një pullë në pasaportë nga autoritetet greke.
