Presidenti Ilir Meta i ka dhënë të drejtë ambasadores amerikane, Yuri Kim, sa i përket ultimatumit ndaj aktorëve politikë që të ndalojnë lojërat dhe të përfundojnë zbatimin e reformës në drejtësi, si dhe t’i japin drejtim reformës zgjedhore.
Meta tha se ka 4 vite që kërkon t’i jepet fund lojërave me reformën në drejtësi dhe se Presidenti nuk ka funksionin e aktorit politik, ndaj përgjegjësit e vërtetë duhet të ballafaqohen me realitetin.
“Unë kam 4 vjet që them stop lojërave me reformën në drejtësi. Ambasadorja ka shumë të drejtë sepse kanë kaluar 4 vjet dhe shohim vetëm lojëra. Shqetëismi është i drejtë sepse aktorët politik kanë luajtur me këtë çështje. Presidenti nuk është aktor politik, por kryetar i shtetit. Nuk ka surprizuar askënd me veprimet e tij, as partnerët vendas dhe as ndërkombëtar pasi çdo gjë ka qenë e dokumentuar. Për çdo akt që Presidenti ka marrë, ka ërkuar bashkëpunimin e institucioneve të tjera dhe i ka njoftuar paraprakisht. Tani që jemi në këtë situatë presidenti është i gatshëm që të ballafaqohen të gjithë aktorët dhe të shihet kush ka bërë lojëra me reformën në drejtësi”, tha Meta.
Meta mohoi se po negocion ndryshimin e ligjeve të reformës në drejtësi.
“Jo, unë nuk po negocioj, përveç këtyre 14 pikave. I dinë këto të gjithë ambasadorët që në muajin prill. Maskat e reformës kanë rënë me kohë, pavarësisht maskave që mbajnë për shkak të pandemisë”, tha ai.
Kreu i shtetit paralajmëroi se “do t’i kërkoj BE-së hetim edhe për reformën në drejtësi. Si ishte Kushtetuta dhe si janë zbatuar ligjet”.
“Përgjegjësinë ta mbajnë ata që i bëjnë lojërat pas krahëve të shqiptarëve dhe që nuk mbajnë përgjegjësi”, tha Meta.
Ilir Meta mohoi gjithashtu që të jetë ai objektivi i ambasadores Kim, e cila foli për aktorë që po punojnë për “vrasjen e reformës në drejtësi”.
“Të jesh i sigurt që vetëm për Ilir Metën nuk mund ta kishte ambasadorja. Unë e kam takuar shumë shpesh ambasadoren, më shumë se cc’mund të kem takuar ndonjë ambasador tjetër amerikan në Shqipëri. Unë nuk merrem me këto lojëra. Këtë platformë, me kërkesën e saj ia kam dorëzuar ambasadores së SHBA-së”, tha Meta.
