Ndërsa e gjithë bota ka shënuar numra shumë të larta të viktimave nga koronavirusi, ku një nga vendet më të prekura ka qenë Italia, ajo që bën habi për të gjithë janë shifrat në Ballkan e veçanërisht në Shqipëri.
Në një raportim të Corriere della Sera është bërë një tablo e situatës së krijuar nga Covid-19 në të gjithë Europën. Kjo e përditshme italiane e ka konsideruar betejën me virusin si të fituar nga vende të cilësuara “ të dobëta” dhe të varfra.
Shtete si Rumania, Greqia, Shqipëria, Bullgaria, Hungaria apo Sllovakia, shkruhet në artikull, kanë pasur në raport me popullatën, shumë më pak vdekje krahasuar me vende të pasura të kontinentit të vjetër si Franca, Gjermania, Zvicra, Suedia, Belgjika, Britania e Madhe dhe Italia vetë.
Këto vende kanë pasur më pak të infektuar dhe kanë arritur ta kontrollojnë në kohë kurbën epidemike. Përse? Është çështje fati? Mbase është dhe kështu, thotë Corriere. Ose mundësia tjetër është që personat që bartnin virusin kanë lëvizur më shumë në pjesën qendrore të Europës në javët vendimtare të periudhës janar-shkurt.
Ndërsa disa të dhëna bëjnë të mendohet se ka dhe diçka tjetër: këto vende u treguan më të kujdesshme sepse ishin të vetëdijshme për brishtësinë e sistemeve të tyre sanitare. Ndryshe nga Italia e Spanja dhe vendosën të veprojnë shpejt, duke marra masa të rrepta izolimi. “E dinin që nuk ia lejonin dot vetes të rrezikonin në këtë situatë”,-thuhet në një pjesë të këtij shkrimi.
Ndër të tjera në këtë shkrim thuhet se Shqipëria ka vetëm 11 vdekje për 1 milionë banorë ndërsa Britania, 536 Greqia 16 dhe Belgjika, 795; Sllovakia vetëm 5 ndërsa Franca 432. Rumania 60, Zvicra 220.k.t/Fjala.al/
