Analisti Fatos Lubonja kërkon nga opozita e drejtuar nga Lulzim Basha që, po qe e nevojshme, të dalë edhe kundër Ambasadës Amerikane në Tiranë, nëse kjo është në interes të popullit.
“Padyshim që duhet të dalë nëse është në interes të popullit. Duhet të dalë nëse mendojnë se këta (Ambasada) po mbështesin një gjë të padrejtë, me argumenta. Duhet të tregojnë se çfarë mbështetje po jep kjo Ambasadë për instalimin e regjimit në Shqipëri”, tha Lubonja në studion e News 24.
Megjithatë, Lubonja është i mendimit se “opozita pret mbështetjen amerikane, kur do t’i vijë radha”.
“Një opozitë që pret vendin t’ja çlirojë Amerika dhe t’i jap pushtetin atyre, duhet të ngrejë pyetje të mëdha”, tha Lubonja.
Sipas Fatos Lubonjës, reputacioni i Ambasadës së SHBA-së është në rënie për shkak të mbështetjes që po i jep kryeministrit Edi Rama.
“Kjo që po ndodh vjen për arsye përse Ambasada po mbështet Ramën. Reforma në drejtësi duhet të vazhdojë, thotë ambasadorja, sikur është vazhdimësi, por për mua është mbështetje që i jep ‘sheikut të Albanisë’. Shembull më kuptimplotë se si është shkelur drejtësia, është shembja e teatrit. Mbështetja (për Ramën) është për qëllime të tjera që nuk kanë të bëjnë me shtetin e së drejtës në Shqipëri”, u shpreh Lubonja./ Fjala.al
s.k
