Partia Socialiste është e mendimit se listat e hapura mund të ulin cilësinë e përfaqësimit në parlament dhe se depolitizimi i administrimit të zgjedhjeve mund të bëhet me sistem shorti.
Këtë gjë e shprehu teksa ishte i ftuar në Ilva Now në Euronews, përfaqësuesi i PS-së në tryezën e reformës zgjedhore, Damian Gjiknuri.
Deputeti socialist tha se nëse lihet vend për lista të hapura atëherë mund të mos ketë seleksionim të personave me vlera dhe në parlament mund të përfundojnë individë jo të denjë për të përfaqësuar qytetarët.
I pyetur rreth çështjes së depolitizimit të komisioneve zgjedhore, Gjiknuri u shpreh se në këtë pikë ka pasur kontraste me Partinë Demokratike, që sipas tij “do formën e politizuar”.
Gjiknuri më tej shpjegoi propozimin e PS-së për depolitizimin, që siç u shpreh ai, në media është përcjellë si administrim i zgjedhjeve “përmes administratës shtetërore”.
“Është spekuluar. Nuk janë zyrtarë shteti. Janë çdo qytetar i Shqipërisë… si juria amerikane në drejtësi, përfshirë edhe administratën, mund të krijohet një pull i mjaftueshëm për t’u hedhur në short dhe për të caktuar disa zyrtarë në çdo qendër votimi për të administruar votat, partitë do të kenë patjetër njerëzit e tyre, madje mund të ketë edhe me kompromis që disa parti të kenë disa më shumë,” – tha Gjiknuri.
