Ka një garë në Bundesligën gjermane, që motivon shumë Robert Lewandowskin, por ka edhe një sfidë virtuale që intrigon jo pak sulmuesin polak. Në suksesin e fundit me goleadë të Bayern Munich, sulmuesi arriti të shtojë një tjetër “gur” në murin që po ndërton për të fituar “Këpucën e Artë”.
Me rifillimin e kampionateve, sfida mes bomberëve për të rrëmbyer trofeun prestigjioz individual të shënuesit për sezonin 2019/2020, është ndezur përsëri në një kalendar të ngjeshur që do zbulojë thuajse gjithçka në një muaj. Nëse para ndalesës së detyruar nga pandemia, italiani i Lazio, Ciro Immobile mund të vëzhgonte të gjithë nga lart, falë 27 golave të tij në 26 paraqitje në Serie A, tani në krye të klasifikimit është Robert Lewandowski, i cili në katër ditë të Bundesligës ka arritur të dalë i pari…
Gol në pjesën e dytë kundër Union Berlin, goli kundër Eintracht dhe një dopietë në fitoren 5-0 të Bayern Munich ndaj Fortuna Dusseldorf: Gjithsej 29 gola në 27 paraqitje.
Momentalisht në renditje kemi Lewandowski 58, Immobile 54, pasi që të dy luajnë në një kampionat me koefiçentin 2. Immobile është i rrethuar nga bomberët e Bundesliga falë edhe rinisjes së hershme në krahasim me vendet e tjera për të mbledhur gola dhe pikë. Timo Werner nga Leipzig del në vendin e tretë, duke arritur në 48 pikë falë “hat-trick” kundër Mainz në 24 maj. Në vend të katërt, Erling Haaland, i cili pas golit ndaj Schalke mbeti pa shënuar kundër Wolfsburg dhe u ndal për shkak të lëndimit ndaj Bayern.
