Fjala.al ka mësuar ekskluzivisht detaje të reja sa i përket shtyrjes së mbledhjes së Këshillit Politik, ku sot është parashikuar të arrihet marrëveshja përfundimtare për reformën zgjedhore. Duke qenë se në mbledhjen e fundit palët nuk arritën dakordësi për disa çështje, në lojë kanë hyrë diplomatë të huaj të disa prej ambasadave më të rëndësishme në vend.
Mësohet se negociatat po zhvillohen midis këtyre diplomatëve dhe përfaqësuesve të PS, PD dhe LSI, por që nuk janë anëtarët pjesëmarrës në Këshillin Politik, raporton Fjala.al. Bisedimet janë të ethshme, ndonëse ka një tendencë për të rënë në konsensus, në mënyrë që reforma zgjedhore të mbyllet sot, më 31 maj.
Palët kanë ende disa ndasi sa i përket përdorimit të teknologjisë në zgjedhje apo emërimit të një drejtori të ri të Policisë së Shtetit gjatë fushatës zgjedhore. Ndërkohë që opozita parlamentare e përfaqësuar nga Rudina Hajdari, kërkon vazhdimisht hapjen e listave të kandidatëve për deputetë dhe ndryshimit të sistemit zgjedhor. Kjo kërkesë e Hajdarit nuk po merret parasysh nga PS, PD dhe LSI, çka nuk u mohua as nga përfaqësuesi demokrat, Oerd Bylykbashi, gjatë emisionit “Hard Talk” në Fjala Tv.
Mbledhja e radhës e Këshillit Politik është njoftuar për sot, në orën 19:00, ndërkohë që Fjala.al do iu mbajë të informuar për zhvillimet më të fundit.
