Vijojnë negociatat në tryezën e Këshillit Politik për reformën zgjedhore. Takimi ka nisur rreth orës 19:00, ndërkohë që Fjala.al do iu mbajë të informuar për zhvillimet më të fundit.
21:29 Amerikanët vijojnë negociatat për ‘zgjedhoren’, ndërpritet mbledhja e Këshillit Politik
Është ndëprerë përkohësisht mbledhja e Këshillit Politik ku diskutohet për reformën zgjedhore. Raportohet se mbledhja është ndërprerë për shkak të takimit që Damian Gjiknuri, Oerd Bylykbashi dhe Petrit Vasili po zhvillojnë me një përfaqësues të Ambasadës Amerikane.
Fjala.al raportoi gjatë pasdites se takimi i orës 17:00 u shty pikërisht për shkak të negociatave që diplomatët e huaj po zhvillonin me përfaqësuesit politik, ndërkohë që përfaqësuesi amerikan po vijon negociatat edhe brenda ambienteve të Pallatit të Kongreseve.
21:00 Qeveria kujdestare/ Ky është propozimi i opozitës
Është bërë publik propozimi i opozitës jashtëparlamentare për formimin e qeverisë kujdestare para zgjedhjeve parlamentare. Sipas propozimit të dorëzuar në Këshillin Politik, opozita kërkon që 100 ditë para zgjedhjeve të krijohet qeveria kujdestare, një praktikë që duhet ndjekur deri kur vendi të anëtarësohet në Bashkimin Evropian.
2021: Ja propozimet që ka dorëzuar PD dhe LSI për ‘Zgjedhoren’
Partia Demokratike dhe Lëvizja Socialiste për Integrim kanë depozituar propozimet e tyre për reformën zgjedhore. Opozita jashtë parlamentare i ka dorëzuar që mbrëmë propozimet për garancitë e votës në zgjedhje. Pjesë e këtyre propozimeve janë edhe qeveria kujdestare për zgjedhjet dhe roli i Gjykatës Kushtetuese. Diskutimi i tyre ende nuk ka nisur, por të gjitha çështjet janë mbi tavolinën e bisedimeve.
19:22 Reforma zgjedhore/Shoqëria civile: Këshilli Politik drejt dështimit, shkak agjendat e dy partive
Koalicioni për Reforma, Integrim dhe Institucione të Konsoliduara (KRIIK Albania) shprehet se negociatat për reformën zgjedhore janë larg aspiratave dhe pritshmërive për një reformë të vërtetë, të thelluar dhe gjithëpërfshirëse.
Në një komunikim të bërë publik sot, KRIIK thekson se Këshilli Politik i ngritur për këtë reformë “rezultoi një hap zhgënjyes për nga pritshmëritë, si për nga mënyra e funksionimit të tij ashtu dhe nga tematika e çështjeve të mbuluara”.
19:04 Këshilli Politik/ Nis takimi i fundit për marrëveshjen e reformës zgjedhore”
Ashtu siç ishte paralajmëruar, përfaqësuesit politik kanë filluar të mbërrijnë në orën 19:00 në Pallatin e Kongreseve për të zhvilluar mbledhjen e fundit të Këshillit Politik. I pari që ka mbërritur është Damian Gjiknuri, përfaqësues i Partisë Socialiste.
Pas tij mbërriten edhe Oerd Bylykbashi i PD-së, Petrit Vasili i LSI-së dhe Rudina Hajdari e opozitës parlamentare.
Fjala.al raportoi pak minuta më parë se mbledhja e parashikuar për në orën 17:00 u shty për në orën 19:00 për shkak të negociatave ku janë përfshirë edhe diplomatë të huaj në vend.
Fjala.al do iu mbajë të informuar për zhvillimet më të fundit nga reforma zgjedhore, e cila është parashikuar të mbyllet sot.
18:54 Ekskluzive/ Reforma zgjedhore, diplomatët në negociata intensive për një marrëveshje
Fjala.al ka mësuar ekskluzivisht detaje të reja sa i përket shtyrjes së mbledhjes së Këshillit Politik, ku sot është parashikuar të arrihet marrëveshja përfundimtare për reformën zgjedhore. Duke qenë se në mbledhjen e fundit palët nuk arritën dakordësi për disa çështje, në lojë kanë hyrë diplomatë të huaj të disa prej ambasadave më të rëndësishme në vend.
