Sot për Paris Saint Germain skadon e drejta për të blerë kartonin e sulmuesit argjentinas Mauro Icardi, diçka e cila pritet të formalizohet nga të gjitha palët siç është paralajmëruar. Zyrtarizimi i marrëveshjes me Interin do të ndodhë pas paraqitjeve impresionuese të bomberit kontrovers në ekipin parizien.
Shumica e punës është bërë më herët këtë javë. Te zikaltërit do të shkojnë 50 milionë Euro në arkat e klubit plus tetë të tjerë bonus. Këtu ka edhe diçka tjetër: 15 milionë Euro më shumë fitim për Inter nëse PSG do ta shiste në Itali brenda 12 muajve, por me një klauzolë që nuk i lejon transferimin te Juventus.
Verën e kaluar të dy klubet kishin rënë dakord për një çek 70 milionë Euro por në fund u arrii një zbritje prej rreth dhjetë milionësh. Lajmi i vërtetë është futja efektive e të ashtuquajturës klauzolë anti-Juve, e cila u përfol shumë kohë më parë.
Bardhezinjtë gjithmonë e kanë vlerësuar Icardi dhe Interi dëshiron ta parandalojë kalimin te rivalët e përjetshëm.
