“Aleanca e grave deputete” ka bërë një mbledhje online për dhunën në familje dhe abuzimin e grave dhe vajzave, duke marrë shkas nga ngjarja e fundit në vendin tonë, abuzimin seksual të një 15-vjeçareje në Babrru.
Gjatë fjalës së saj, deputetja socialiste, Vasilika Hysi pranoi se me këtë ngjarjen, institucionet kanë dëshmuar se dështuan për mbrojtjen e fëmijëve dhe i kërkoi ligjvënësve për të bërë një nismë konkrete, ose përndryshe, sipas saj të lenë mandatet.
“Ne kemi dështuar në mbrojtjen e fëmijëve, ju mund të thoni se jemi shumë mirë por mua më vjen turp, jemi të dështuar. Po të bëjmë sot një fushatë në të gjithë shkollat dhe të kërkojmë nga fëmijët se kush i ka ngacmuar besoj se shifrat do të jenë shumë të larta dhe ne të tëra nuk do të kemi fytyrë jo vetëm të bëjmë kështu mbledhje por të dalim në rrugë. Si mundet policia komunitare në Babrru që shikon parullat dhe nuk njofton nuk reagon. Në kuadër të kësaj ne si deputete duhet të bëjmë një nismë konkrete, përndryshe le të lëmë mandatet dhe të vijojmë karriere tona ku ne mund të bëjmë më shumë”, deklaron Hysi.
Për deputeten Mimi Kodheli, përgjegjësi për ngjarjen e rëndë ka edhe sistemi arsimor, ku nuk i kurseu rezervat për mësuesit.
“Dikur ne mësuesit i konsideronim si prindërit tanë të dytë, të ka marrë në telefon prindi, të paktën unë i takoj asaj gjenerate, dhe mësuesja merrte në telefon dhe thoshte se pse ka munguar fëmija. Por sot zysha tona e kanë mendjen për të bërë të tjera punë, nuk të del koha të jesh edhe zyshë të bësh ditarin tërë ditën, të lysh edhe flokët, sytë buzët, vetulla me funde e minifunde. Zysha tona kanë qenë të pamartuara dikur por sot smerret vesh se kush është bërë zyshë. Do ta marrim këtë situatë në dorë apo do flasim”, ka thënë Kodheli./E.B./Fjala.al
https://www.facebook.com/kuvendishqiperise/videos/186043416032112/
