Vrasja e George Floyd nga katër oficer policie në SHBA, teksa viktima nuk po bënte asnjë rezistencë, ka shkaktuar trazira të shumta. Në të gjitha shtetet e SHBA-së po organizohen prej ditësh protesta, ndërkohë që aktivistët flasin për nevojën e një levizjeje të re për respektimin e të drejtave të zezakëve.
“Jetë e zezakëve vlen” është një prej sloganeve kryesore që po përdoret masivisht në protesta. Afro-amerikanët po deklarojnë në masë se janë të paragjykuar brenda shoqërisë amerikane, ndaj është e nevojshme një lëvizje e re për të vendosur barazinë raciale.
Por sa diskriminohen zezakët në SHBA? Faqja e World Economic Forum ka publikuar 10 statistika që tregojnë pabarazinë e thellë në Amerikë midis të bardhëve dhe njerëzve me ngjyrë.
1-Është e mundur 5 herë më shumë që të rriturit zezakë në SHBA të jenë në burgje sesa të bardhët. Në vitin 2018, amerikanët zezakë përbënin 33% të të dënuarve, edhe pse përfaqësojnë vetëm 13% të popullisë së rritur në SHBA.
2-Ndërkohë që 72% e familjeve të bardha amerikane zotërojnë një banesë, vetëm 41% e familjeve të zezakëve kanë banesë të tyre.
3-Të ardhurat mesatare të një familje të bardhë (jo hispanike) arrijnë në 171 mijë dollarë, ndërsa të ardhurat mesatare në familjet e zezakëve nuk janë më shumë se 17 mijë dollarë.
4-Zezakët paguhen mesatarisht 694 dollarë në javë, ndërsa të bardhët paguhen mesatarisht 916 dollarë në javë.
5-Gratë zezake paguhen 21% më pak se gratë e bardha.
6-Gratë zezake rrezikojnë 3 herë më shumë të vdesin nga probleme që lidhen me shtatzaninë.
7-Vdekja nga koronavirusi në SHBA është 2.4 herë më e lartë te zezakët krahasuar me të bardhët.
8-Në muajin prill, papunësia te zezakët në SHBA arriti në 17%, ndërsa te të bardhët në 14%.
9-Tre në pesë zezakë pranojnë se padrejtësisht janë ndaluar nga policia për shkak të ngjyrës.
10-89% e nxënësve të bardhë e përfundojnë gjimnazin, ndërsa te zezakët kjo shifër është 79%.
