I mandatuari për kryeministër të ri të Kosovës Avdullah Hoti ka deklaruar sot gjatë fjalës së mbajtur në Kuvend se nuk do të ketë shkëmbim territoresh me Serbinë.
Hoti u shpreh se dialogu i udhëhequr nga ndërkombëtarët do të mbetet prioritet, por pavarësisht kësaj ai nuk do lejojë asnjë plan apo projekt për shkëmbim territoresh.
“Prioritet do të jetë edhe marrja e përgjegjësive për të çuar procesin e dialogut në bashkëpunim me BE e SHBA duke mos lejuar ndryshim territori e shkëmbim territorit”, deklaroi Hoti.
Duke folur për prioritetet, i mandatuari për kryeministër tha se së bashku me partnerët e tjerë qeverisës do të kujdesen edhe për prioritetet e tjera si forcmimi i shtetit, avancimi i demokracisë, luftimi i korrupsionit, zhvillimi ekonomik, marrja e përgjegjësive kushtetuese për dialogun mes Kosovës dhe Serbisë me përfshirje të Bashkimit Evropian dhe Shteteve të Bashkuara të Amerikës. /Fjala.al/
