Një 43-vjeçar është shpallur në kërkim nga policia pasi ushtronte veprimtari të paligjshme në lokalin e tij në lagjen nr. 8 në Korçë. Pas kontrollit të policisë, atij iu gjet dhe sekuestrua njësi kompjuterike dhe monitorë të cilët dyshohet se shërbenin për lojëra fati të palejuara.
Ndërkohë, është arrestuar punëtori i tij, i cili punonte si kamerier dhe ishte i pasiguruar.
Njoftimi
Ushtronte aktivitetin e paligjshëm të lojërave të fatit dhe mbante të pasiguruar një punonjës, shpallet në kërkim pronari i një lokali dhe arrestohet në flagrancë punëtori i tij.
Sekuestrohen në cilësinë e provës materiale njësi kompjuterike dhe monitorë.
Në vijim të punës për evidentimin dhe ndëshkimin e personave që vijojnë ende të ushtrojnë aktivitetin e kundërligjshëm të lojërave të fatit, specialistët për hetimin e krimit ekonomik-financiar në DVP-Korçë bënë arrestimin në flagrancë të shtetasit R. K., 20 vjeç, si edhe shpallën në kërkim e po punojnë për kapjen e shtetasit M. D., 43 vjeç, banues në Korçë.
Gjatë kontrollit të ushtruar nga policia në lokalin e 43-vjeçarit, në lagjen nr. 8, Korçë, iu gjetën dhe sekuestruan në cilësinë e provës njësi kompjuterike dhe monitorë, të cilët dyshohet se shërbenin për lojëra fati të palejuara. Si edhe nga verifikimet e kryera rezultoi se shtetasi R. K., kamerier në këtë lokal, ishte i pasiguruar pranë organeve tatimore.
Materialet në ngarkim të tyre i kaluan Prokurorisë Pranë Gjykatës së Shkallës së Parë Korçë për veprat penale “Fshehja e të ardhurave”, “Organizimi ose ushtrimi i veprimtarive të lojërave të fatit në kundërshtim me ligjin” dhe “Punësimi i paligjshëm”.
