Ka dalë ekspertiza e binjakëve 5-muajsh që humbën jetë në Berat. Rikujtojmë se vdekja e binjakëve në muajin janar iu ngarkua si përgjegjësi qumështit që ushqeheshin foshnjat.
Kanë mbërritur në Prokurorinë e Rrethit Gjyqësor Berat përgjigjet e analizave baktereologjike, fizike e kimike të vdekjes së dy foshnjëve 5-muajshe, ngjarje që ndodhi në Janar të këtij viti.
Sipas këtyre analizave, në organizmin e fëmijëve nuk kanë rezultuar mbetje toksike, ndërkohë që edhe qumështi me kuti që përdorej për të ushqyer fëmijët nuk ka pasur në përbërjen e tij elementë toksikë.
Nga përgjigjet e Institutit të Mjekësisë Ligjore në Tiranë bëhet me dije që tashmë kanë mbërritur zyrtarisht pranë institucionit të Prokurorisë së Beratit rezultatet se vdekja e dy foshnjëve 5-muajshe ka qenë aksidentale dhe ka ardhur për shkak të asfiksimit nga mungesa e ajrit.
Sipas këtyre analizave shtohet se vdekja e fëmijëve ka ndodhur sepse mbulimi me batanije, pas ushqyerjes së tyre ka sjellë-sipas ekspertëve-asfiksimin e foshnjëve dhe vdekjen e tyre.
Rikujtojmë se ngjarja e rëndë ndodhi mëngjesin e 26 Janarit të këtij viti në lagjen “Uznovë” në qytetin e Beratit. Ndërsa nëna e foshnjëve 5-muajshe Merushe Agalliu, pasi kishte ushqyer fëmijët e saj binjakë me qumësht kutie, i kishte vendosur ata në krevatin e tyre për të fjetur, por siç edhe ka nxjerrë përfundimi i mjekësisë-ligjore, ajo i kishte mbuluar më tepër seç duhet fëmijët dhe kjo ka sjellë asfiksimin e tyre në gjumë dhe më pas vdekjen.
Bebet mbërritën pa jetë në Spitalin Rajonal të Beratit dhe prindërit e tyre, Eduart e Merushe Agalliu kanë pasur asokohe dyshime se vdekja mund të kishte ardhur për shkak të helmimit të qumështit me kuti që përdornin për t’i ushqyer fëmijët që nga dita e tyre e lindjes.
Binjakët jetonin me prindërit Eduard dhe Merushe Agalliu dhe me motrën 6-vjeçe dhe vëllain 5-vjeç në një banesë dy katëshe në periferi të qytetit, në lagjen “Uznovë”.k.t/Fjala.al/
