Është zbardhur drafti i Qeverisë për amnistinë fiskale e cila do të lejojë deklarimin dhe depozitimin e pasurive ligjërisht në banka, pa detyrime fiskale dhe pa përgjegjësi penale.
Kategoria që përjashtohet nga kjo amnisiti, sipas projektligjit të siguruar nga News24, është ajo e politikanëve dhe zyrtarëve të lartë që kanë të ardhura nga krimi dhe korrupsioni.
“Individët, personat fizikë dhe personat juridik, subjekte përfitues sipas parashikimeve të këtij ligji me pajisjen me vërtetimin e përfundimit të procesit të deklarimit vullnetar përjashtohen nga detyrimi i dhënies së informacionit pranë institucioneve përkatëse administrative në lidhje me kohën, mënyrën e krijimit, mbajtjen ose poseidimin e pasurive të deklaruara në përputhje me parashikimet e këtij ligji, përjashtohen nga ndjekja e procedurave hetimore dhe administrative si edhe nga ndekja penale dhe procedimi penal në kuadër të ligjit penal të zbatueshëm në Shqipëri për veprat penale në lidhje me pasuritë e deklaruara sipas kushteve dhe parashikimeve të këtij ligji” thuhet në draft.
Për realizimin e amnistisë fiskale do të ngrihet një strukturë e posaçme pranë tatimeve dhe deklarimi vullnetar mund të bëhet pranë kësaj strukture ose pranë bankave të nivelit të dytë.
Çdo individ do të plotësojë fillimisht një formulari aplikimi në rastin e parave për depozitimin e shumës në një numër llogarie bankare të hapur për këtë qëllim dhe më pas do verifikohen të dhënat. Sipas draftit është propozuar që legalizimi i të ardhurave do të kryhet kundrejt një tatimi që do të paguajnë individët të ndarë në disa kategori.
Aminista do të zgjasë për një periudhë 1 vjeçare. Të gjithë ata që do të deklarojnë brenda 4 muajve të parë pas hyrjes në fuqi të ligji tatimi do të jetë 5% i të ardhurave. Ata të cilët do të deklarojnë në 4 mujorin e dytë, tatimi do të jetë 7% dhe për ata që do ta lënë këtë proces në 4 muajit e fundit të amnistisë atëherë tatimi do të jetë 10%, pra dyfish më i lartë. Ky tatim për deklarimin e pasurive vlen edhe për ato pasuri që gjenden jashtë territorit të Republikës së Shqipërisë, që i përkasin emigrantëve apo individëve që jetojnë në vendin tonë./E.B./Fjala.al
