Juventus avancoi në finalen e madhe të Kupës së Italisë, pas barazimit 0-0 në shtëpi ndaj Milanit, një rezulta që premion armatën e trajnerit Maurizio Sarri për shkak të golit në fushë kundërshtare. Në “J Stadium” nuk u tund rrjeta qoftë një herë të vetme, por goli në barazimin 1-1 në stadiumin San Siro në transfertën ndaj kuqezinjve, e çon Ronaldo & Co në finalen e turneut të dytë për nga rëndësia në Apenine.
Fraksioni i parë i lojës rezervoi më shumë detaje pikante se i dyti. Cristiano Ronaldo kishte në këmbët e tij një top që do ndryshonte totalisht llogaritë nëse shkonte në rrjetë. Por penalltia e marrë përsipër nga portugezi kishte potencë por jo saktësi dhe u ndal nga shtylla e portës së Milan. (fjala.al). Kronika u pasurua me kroatin Ante Rebic që nuk dihet se nga ku e shpiku një faull vrasës që rrezikoi kokën e Danilo, dhe nuk e shmangu dot përjashtimin direkt nga arbitri.
Në superioritet numerik, Sarri u pa jo pak herë i trazuar nga vija anësore duke kërkuar avantazhin që gjithsesi nuk erdhi kurrë as të gjithë pjesën e dytë. Juventus kualifikohet në finale edhe me këtë barazim “shterpë” dhe tani pret i qetë përballjen Napoli-Inter mbrëmjen e së shtunës, për të mësuar me kë do diskutojë trofeun.
ndërkohë Milan që nuk fiton ndaj Juventus në Kupën e Italisë që prej vitit të largët 1985, nuk e bëri dot as këtë herë, e ndoshta do të duhet kohë për shortin dhe kalendarin, që ta provojë sërish kundër fatit të keq.
