Nxënësit u ankuan se provimet e maturës shtetërore ishin të vështira, menjëherë ka reaguar edhe zv. kryetari i Lëvizjes Socialiste për Integrim, Luan Rama.
Ky i fundit me anë të një postimi në rrjetin social shkruan se testet e këtij viti janë dëshmi e injorancës së ministrisë së Arsimit.
Rama ka publikuar një nga kërkesat e testit të Anglishtes.
Postimi i plotë i Luan Ramës:
Një shembull dhe një problem:
TESTET E PROVIMIT TË MATURËS, SI DËSHMI E INJORANCËS SË MINISTRISË SË ARSIMIT
Provimet e maturës kanë qenë e në fakt do të duhet të jenë gjithmonë një moment shumë i rëndësishëm, për maturantët vetë po e po, por edhe për prindërit e tyre, për mësuesit, për shkollën e për gjithë shoqërinë.
Sepse, aq sa janë mbyllja e një periudhe të rëndësishme të sistemit të shkollimit dhe edukimit, janë edhe nisja e një etape të re në jetën e maturantëve, të etapës së përballjes me sfidat e jetës.
Mirëpo në fakt, provimet e këtij viti ca më shumë se një vit më parë, janë kthyer në një makth e për më keq se kaq, testet e përgatitura nga QSHA, institucion në varësi të Ministrisë së Arsimit, në vend që t’iu japin maturantëve mundësinë të shprehin gjithë njohuritë e fituara, i venë ata, pra maturantët, përballë një labirinti pyetjesh pa kuptim, pa përmbajtje e për më tepër, në tërësi i venë përballë pyetjesh që janë dëshmi e injorancës së atyre që i kanë përgatitur.
Pa asnjë tendencë negativiste, më duhet të them se sistemi i maturës shtetërore është një dështim, siç është në fakt dështim e gjithë politika arsimore që po zbatohet pa asnjë vizion e pa asnjë shenjë horizonti se ku duhet të mbërrijë shkolla jonë dhe i gjithë sistemi ynë arsimor.
Për ta bërë më të qartë arsyen se përse matura shtetërore është një dështim dhe po aq, edhe një sistem fyes e tallës për maturantët, po ju sjell një shembull nga testi i gjuhës angleze, të zhvilluar gati dhjetë ditë më parë, e gjithsecili prej jush të verë veten në provë që t’u japë përgjigje pyetjeve të testit të ministrisë së Besës së qeverisë së Edi Ramës.
Ja njëra nga kërkesat e testit:
Në anglisht:
“Jane was the 7th out of 8 children.
What child was jane?
A. The first one,
B. The second one,
C. The 5-th one,
D. Or the last one?
Përkthimi i testit në shqip:
Xhein ishte e shtata nga tetë fëmijë.
Cili fëmijë ishte Xhein?
A. Fëmija i parë,
B. Fëmija i dytë,
C. Fëmija i pestë,
D. Fëmija i fundit?)
Dhe tani, le t’u përgjigjet këtyre pyetjeve të testit, në anglisht apo në shqip, zonja ministre e arsimit apo edhe vetë zotëria kryeministër i saj, e pastaj le të na tregojnë përralla për maturën shtetërore dhe për sistemin e tyre arsimor!
Bo.Ba/fjala.al
