Ishte një ndeshje me kontraste për dy shqiptarët në anët e kundërt të fushës ajo që sapo ka përfunduar në Paderborn dhe ku Verder Bremeni mundi thellë, 5-1, skuadrën vendase, duke rritur shpresat për mbijetesë.
Por, përtej rezultatit, kjo nuk ishte një ditë edhe aq e mirë, si për ish-futbollistin e Kombëtares kuqezi, tanimë lojtar i përfaqësueses së Kosovës, Milot Rashica, ashtu edhe futbollistin aktual të Kombëtares, Jurgen Gjasula.
Kjo sepse, teksa i pari shkoi dëm një mundësi të artë për të kaluar skuadrën e tij në epërsi në një moment vendimtar, i dyti nuk vonoi ta shkruajë emrin e tij në librin e rekordeve, por atyre famëkeqe, të Bundesligës gjermane. Skuadra e Milot Rashicës fitoi “derbin” e ekipeve të fundit të tabelës me dy gola të Kla’asenit dhe nga një të Egeshtajnit, Osakos e Fullkrugut. Golin e ngushëllimit tek Paderborni, teksa ishte në disavantazh 0-4, shënoi Sabiri.
Dy futbollistët shqiptarë kanë qenë protagonist në pjesën e parë të kësaj sfide. Fillimisht Milot Rashica shkoi dëm një 11-metërsh për Verderin në minutën e 19-të dhe bashkë me të edhe mundësinë për ta kaluar skuadrën e tij në epërsi.
Goditjen e tij e priti portieri i Paderbornit. Sidoqoftë, Rashica e shpagoi sadopak veten 15 minuta më pas, teksa ishte ai që nisi aksionin që solli golin e dytë, të shënuar nga Juja Osako. Davi Kla’asen shënoi golin e parë dhe të tretin.
Goli i 3-të u realizua në fakt pas pas një harkimi të Rashicës. Ndërkohë, në krahun tjetër, Klaus Gjasula i Paderbornit është ndëshkuar me karton të verdhë. Gjasula kështu ka vendosur rekordin të Bundesligës sa i takon numrit të kartonëve të verdhë brenda një edicioni. Ai është ndëshkuar për herë të 17-të këtë edicion. Rekordi i mëparshëm mbahej nga ish-futbollisti polak, Tomash Hajto, por shqiptari i ka marrë këto kartona në një numër më të vogël ndeshjesh.
Verderi tani është e 17-ta në tabelën e renditjes, me 28 pikë të tubuara, po aq sa ka edhe Fortuna e Dyseldorfit, që është e 16-ta dhe mban vendin që të çon në “play-out”-in për mbijetesë. Paderborni është i fundit me 20 pikë dhe është vetëm një pikë larg rënies edhe matematikisht nga Bundesliga e parë në atë të dytën, teksa deri në fund kanë mbetur edhe 3 javë për t’u luajtur.
la.mi/Fjala.al
