Ndryshimet ligjore që pritet të propozojë grupi parlamentar i Partisë Socialiste në zgjidhjen e ngërçit për kreun e ri të Kontrollit të Lartë të Shtetit, nuk synojnë t’i heqin të drejtën presidentit për propozimin e tij, por do ta detyrojnë kreun e shtetit që kanditatura t’i përmbushë të gjitha kushtet ligjore.
Mazhoranca do të propozojë shtimin e postit të zëvendëskryetarit të Kontrollit të Lartë të Shtetit, i cili do ta drejtojë këtë institucion deri në zgjedhjen e kreut të ri. Në projektligjin që pritet të dorëzohet në Kuvend, parashikohet shfuqizimi në ligjin aktual i normativës që mban në detyrë dy vjet pas përfundimit të mandatit të Bujar Leskajn, deri në zgjedhjen e pasardhësit. Në dhjetor 2018 mbaroi mandati 7-vjeçar i kryetarit të tanishëm të KLSH-së, Bujar Leskaj.
Propozimi
Burime nga grupi parlamentar i Partisë Socialiste bëjnë të ditur se në draftin që do të dorëzohet për diskutim në komisionet parlamentare, thuhet se “zëvendëskryetari i Kontrollit të Lartë të Shtetit emërohet për një mandat trevjeçar, me të drejtë rizgjedhjeje më shumë se një herë dhe ushtron funksionet e kryetarit, në të gjitha rastet kur vendi i kryetarit mbetet bosh, për shkak të mbarimit të mandatit ose shkarkimit”.
Përmes një dispozite tranzitore mazhoranca pritet t’ia delegojë Komisionit të Ekonomisë dhe Financave të drejtën për amendime në ligjin për funksionimin e Kontrollit të Lartë të Shtetit.
‘Komisioni për Ekonominë dhe Financat, brenda 15 ditëve vijuese i propozon Kuvendit kandidaturën që do të komandohet në postin e zëvendëskryetarit të KLSH-së dhe do të qëndrojë në detyrë deri në përfundimin e emërimit dhe plotësimit të vakancës së kryetarit të KLSH-së’- thuhet në draftin paraprak që do të dorëzohet në Kuvend.
Përplasja mes presidentit dhe Kuvendit u formalizua, duke u artikuluar publikisht më 2 qershor, kur kryetari i Kuvendit, Gramoz Ruçi, i ka kërkuar presidentit Meta të propozojë kandidaturat për kryetar të ri të Kontrollit të Lartë të Shtetit.
“Presim propozimin tuaj për kreun e KLSH-së. Kemi muaj që presim emrin për kreun e KLSH-së. Presidenti duhet t’i respektojë afatet sipas Kushtetutës.” – shkruan Ruçi në një letër dërguar presidentit Ilir Meta.
Letrës së kryetarit të Kuvendit iu përgjigj zëdhënësi i presidentit Meta, Tedi Blushi, i cili sqaroi se presidenti ka dërguar tri kandidaturat e tij për kryetar të KLSH-së. “Presidenti Meta, si gjithmonë do t’i përmbushë detyrimet e Tij kushtetuese për të garantuar pavarësinë e institucioneve”, shkruan Blushi në një postim në facebook.
Votat
Ndryshimet ligjore për t’i hapur rrugë shtimit të një posti të ri në Kontrollin e Lartë të Shtetit, çka do të mundësonte zgjidhjen e ngërçit me presidentin e Republikës kërkojnë 84 vota në Kuvend.ka.ta/Fjala.al/
