Ka rezultuar një dështim dhe një pengesë e bujshme transferta e Tiranës këtë të hënë në Durrës ndaj Teutës, një ndeshje në të cilën kryeqytetasit vuajtën disfatën minimale 1-0, por mjaftueshëm për të komplikuar fushatën fantastike që po i çonte drejt titullit. Tani “froni” i Superiores është i vlefshëm por diferenca me Kukësin është vetëm 6 pikë, praktikisht dy gabime të rënda që mund të anulojnë një sezon të tërë.
Në stadiumin “Niko Dovana” pika kulmore ishte kthesa spektakolare e Emiliano Vilës pa u mbushur ende gjysmë ore lojë. Veprimi i sulmuesit të durrsakëve shtangu lojtarët miq, dhe ata pak tifozë që kishin uzurpuar një tarracë pallati për të dhënë “show” me fishekzjarre e për të mbështetur Tiranën.
Rastet ishin të shumta në të dy portat, e madje dhe hyrjet ilegale të tifozëve në stadium, që u izoluan nga stjuardët. Por goli mbeti në fuqi deri në fund. Me këtë humbje Tirana tani detyrohet të ndalojë serinë pozitive nga e cila nuk regjistronte një disfatë prej 17 ndeshjesh. Praktikishtdisfata e fundit ishte në Dhjetor ndaj Kukësit. Ky i fundit mund të shpresojë për titullin, edhe pse në javët e mbetura, fati është në “këmbët:” e bardhebluve, dhe jo të skuadrës verilindore. (fjala.al)
