Sipas shefes së Departamentit të Epidemiologjisë rritje e numrit të infektimeve me COVID-19 ka ardhur për shkak të moszbatimit të masave nga qytetarët dhe institucionet.
Gjatë një interviste për OraNews ajo deklaroi se qytetarë menduan se virusi iku, por sipas saj një shkelje sado e vogël e masave sjell përhapjen e virusit.
”Kemi të bëjmë me një rritje të koronavirusit në Shqipëri. Këtë e tregon edhe numri i rasteve. Shumë nga rregullat e parandalimit të infeksionit nuk janë zbatuar. Kjo është edhe një nga arsyet pse në disa nga institucionet publike apo private, kemi pasur raste me koronavirus. Kjo ka ardhur si pasojë e mosrespektimit të masave të kontrollit të infeksionit. Kur flasim për masat e kontrollit të infeksionit ato nuk janë vetëm për institucionet shëndetësore, por kanë të bëjnë me të gjitha llojet e institucioneve. Protokollet janë shumë të qarta për këtë gjë. Shpesh herë njerëzit e neglizhojnë. Ne në maj patëm një numër shumë të pakët të rasteve dhe një pjesë e mirë e njerëzve menduan se koronavirusi iku, por koronavirusi ka qenë aty. Një shkelje sado e vogël e masave të kontrollit të infeksionit sjell përhapjen. Kemi të bëjmë me një sëmundje tepër ngjitëse.” tha Bino.
Sot, në vendin tonë u regjistrua shifra më e lartë e rasteve ditore me COVID-19, pasi MSH raportoi për 82 raste pozitive./En.Br./Fjala.al
