Trajneri i Napolit kërkoi të karikojë ekipin e tij për finalen e Kupës së Italisë ndaj Juves. Ai vlerësoi rivalët por kaloi gjithashtu presionin te torinezët
“Kurrë nuk ka një kohë më të mirë për të takuar Juve, fitorja është pjesë e ADN-së së saj, e historisë së klubit. Ka lojtarë me një mentalitet të shkëlqyer. Ne duhet të jemi shumë të mirë, t’i respektojmë ata dhe të luajmë me armët tona” tha Gattuso.
Trajneri i Napolit, Gennaro Gattuso karikoi skuadrën përpara mbrëmjes së së mërkurës në finalen e Kupëse kundër bardhezinjve. Elozhe të mëdha për Maurizio Sarri, kolegun e tij.
“Më pëlqen gjithçka, nuk e mohoj që kam bërë kaq shumë copy & paste në këto vite për punën e tij. Kam parë shumë video se si ai ka luajtur me linjën e mbrojtjes, si ai filloi të imponojë driblimet në kampionatin italian, më pëlqen gjithçka te Sarri” tha Gattuso.
Gattuso iu rikthye dhe polemikave për futbollistin Lozano. “Kush është i lodhur dhe nuk e ndjen të zbresë në fushë, kush nuk është i qartë mund të qëndrojë në dhomat e zhveshjes. Kur fërshëllej, dua lojtarët të shkojnë me 1 mijë km në orë. Nuk lejoj askënd të më prishë stërvitjen” tha ai.
