Pas 30 vitesh burg në Shtetet e Bashkuara të Amerikës, Carlos Lehder Rivas, është ekstraduar në Gjermani, duke mbërritur të martën në Frankfurt
Ai është një prej bashkëthemeluesve të Kartelit famëkeq të Medelinit, bashkë me Pablo Escobar, dhe një ndër të parët që trafikoi kokainë nga Kolumbia drejt Shteteve të Bashkuara në vitet 1970-1980.
Gjykata amerikane e dënoi 70-vjeçarin, me nënshtetësi kolumbiane dhe gjermane, me 134 vite burg në vitin 1987, por më vonë Carlos Lehder Rivas bashkëpunoi me autoritetet dhe kaloi në programin e mbrojtjes së dëshmitarëve. Dhe duke qenë se është dënuar një herë në SHBA, nuk do të gjykohet më për të njëjtat krime në Gjermani.
“Der Spiegel” shkruan se Lehder, i cili nuk e ka fshehur kurrë admirimin e tij për Hitlerin, do të jetojë i ndihmuar nga një grup bamirësie në Gjemani.
Sipas asaj që është raportuar në mediat kolumbiane, në SHBA ai u përfshi në botën e krimit, i dënuar për herë të parë në vitin 1973 për vjedhje makine. Në burg ai lidhi miqësi me trafikantin e drogës George Jung, të dy nisën rrjetin e trafikut të kokainës në SHBA.
Pasi u arratis për në Kolumbi kur DEA e shpalli në kërkim, Lehder u bë pjesë e Kartelit të Medelinit dhe operacioneve të Pablo Escobar. Në vitin 1987 bosi i drogës e spiunoi tek autoritetet kolumbiane dhe ai u arrestua, për t’u ekstraduar më pas në SHBA.
Mund tëthuhet se Carlos Lehder Rivas, është anëtari i fundit i madh i kartelit Medelin që është akoma gjallë.
Raportohet se Lehder është sëmurë dhe udhëtimi i tij në Gjermani mendohet të jetë i fundit në jetën e tij./En.Br./Fjala.al
