Vihet në pranga një nga autorët e dyshuar të Hekuran Billës, tek “Komuna e Parisit. I arrestuari është i afërm i Prel Markut, i ekzekutuar nga Billa në Angli 16 vite më parë.
I ndaluari është mbajtur nën vëzhgim nga policia e Tiranës, Lezhës dhe e Shkodrës. Ai është pikasur në zonë natën kur u ekzekutua Billa.
Dyshohet, se ai ka mbajtur nën vëzhgim 40-vjeçarin dhe i ka dhënë informacion mbi lëvizjet bashkëautorëve të tij, që kryen vrasjen.
Kanë qenë kamerat e sigurisë ato që kanë ndihmuar në identifikimin e të dyshuarit.
Ekzekutimi i 40-vjeçarit ndodhi më 11 qershor. Arma e krimit, u gjet pak më vonë në një kosh plehrash, një automatik Mp5 me silenciator, si ato që përdor Garda. Një armë e tillë nuk rezulton e regjistruar.
Viktima me origjinë nga Kukësi, kishte vetëm një vit që kishte dalë nga burgu, ndërkohë që bashkë me familjen jetonte në fshatin Domje të Tiranës dhe nuk ishte i martuar.
Hekuran Billa është akuzuar për vrasjen e një shqiptari në Angli. Sipas medias britanike Hekuran Billa, kur ishte 28 vjeç, qëlloi me plumb në kokë shqiptarin Prel Marku, 22 vjeç.
Vrasja ka ndodhur në Park Royal më 14 tetor 2006. Billa u shpall fajtor për tre akuza për vrasje dhe u dënua me burgim të përjetshëm, me një kufizim minimal të rekomanduar prej 34 vjet.
Pas krimit Billa iku në Danimarkë, për tu kapur më tej, ndërkohë që u transferua në Shqipëri për të vuajtur dënimin, ku arriti të lirohej para kohe.
Në orët në vijim policia, pritet të dalë me komunikatë zyrtare, ku të japë informacion në lidhje me ngjarjen./Bl.Ba/Fjala.al
