Policia e Tiranës del me deklaratë lidhur me arrestimin e të dyshuarit si bashkëpunëtor në vrasjen e Hekuran Billës, krim i ndodhur mbrëmjen e 11 qershorit.
Konfirmohet identifikimi, kapja dhe vënia në pranga e një nga bashkëpunëtorët në vrasjen e Billës.
Nga Sektori i Krimeve të Rënda ndaj Jetës dhe Pronës dhe Sektori i Forcës Operacionale dhe Kërkimit në DVP Tiranë, pas një pune të mirorganizuar dhe të pandërprerë, nën drejtimin e Prokurorisë së Rrethit Gjyqësor Tiranë, u bë i mundur ndalimi i shtetasit Sajmir Marku, 22 vjeç, banues në Tiranë.
Ndalimi i tij shtetasi u bë pasi, në datën 11 qershor, rreth orës 21:50, në rrugën “Prokop Mima” Tiranë, ka bashkëpunuar në vrasjen me armë zjarri të shtetasit Hekuran Billa. Shtetasi S. M. është nipi i shtetasit Prel Marku, i cili është vrarë në vitin 2006, në Angli, nga viktima Hekuran Billa.
Menjëherë, pasi ndodhi kjo ngjarje është bërë edhe shpallja në kërkim e shtetasit Viktor Marku, si një nga autorët e dyshuar të kësaj ngjarjeje.
Në cilësinë e provës materiale janë sekuestruar 3 automjete dhe një sërë provash të tjera materiale, me të cilat dokumentohet implikimi i këtij shtetasi në këtë ngjarje.
Ndërkohë, vazhdon puna për identifikimin dhe kapjen e autorëve të tjerë të mundshëm të përfshirë në këtë ngjarje.
Ndaj të dyshuarve materialet iu referuan Prokurorisë së Tiranës, për veprat penale “Vrasja për gjakmarrje”, e kryer në bashkëpunim dhe “Armëmbajtja pa leje”./Bl.Ba/Fjala.al
