Gjykata e Tiranës ka caktuar masën e sigurisë “Arrest me burg” me burg për Viktor Markun të arrestuar si autori kryesor i vrasjes së Hekuran Billës.
Vendimi ishte parashikuar të jepej që dje, por u shty për sot për shkak se avokati i tij Ilir Murati pretendonte se arrestimi i klientit të tij ishte bërë në mënyrë paligjshme, pasi sipas tij nuk kishte një urdhër ndalimi për të dhe për këtë shkak togat e zeza i kërkuan më shumë informacion prokurorisë rreth arrestimit të tij.
Mësohet se prokuroria paraqiti sot në gjykate dokumentat e ardhura nga Mali i Zi, ku ndalimi është bëre me kërkesë të Interpol Tiranës.
Viktor Marku u prangos katër ditë më parë nga autoritetet policore të Malit të Zi në shtetin fqinj dhe iu dorëzua policisë shqiptare në Pikën Kufitare të Hanit të Hotit. Burime bëjnë me dije se ai u kap në tentativë duke u larguar drejt vendeve të Bashkimit Europian.
Viktor Marku është vëllai i Prel Markut të ekzekutuar nga Hektor Billa në vitin 2006 në Angli. Lidhur me atentatin e 11 qershorit në kryeqytet është arrestuar dhe Sebastian Mali, nipi i Prel dhe Viktor Markut, i cili akuzohet si bashkëpuntor për ngjarjen në fjalë. Vrasja e Billës dyshohet se ka ndodhur për hakmarrje./En.Br./Fjala.al
