Në qytetin e Durrësit pritet të shemben 19 pallate pasi janë shpallur të pabanuara nga tërmeti i 26 nëntorit.
Vendimi është marrë në mbledhjen e sotme të Këshillit Bashkiak, që u zhvillua këtë të enjte online.
Pallatet janë në njësitë administrative Sukth, Manëz, Ishëm, Rrashbull dhe njësinë administrative nr.4 Durrës.
Durrësi së bashku me Krujën ishin zonat më të prekura nga tërmeti i nëntorit.
Vendimet e Këshillit Bashkiak
1- Miratimi i kontratës tip për përfitimin nga grantet e rikonstruksionit për individët ose familjet e dëmtuara nga tërmeti i datës 26.11.2019 me nivel dëmi DS1-DS2-DS3.
2-Vijimi i procedurave të prishjes së detyruar të 12 pallateve të ndodhura në njësitë administrative Sukth, Manëz, Ishëm, Rrashbull dhe njësinë administrative nr.4 Durrës, të gjitha pronë private në zbatim të ekspertizave të thelluara të hartuara nga Instituti i Ndërtimit, Tiranë.
3-Miratimi i vërtetimit të lëshuar nga kryetari i fshatit dhe administratori i njësisë administrative si pjesë e dokumentacionit të dosjes së aplikuesit për të përfituar nga programet e rindërtimit.
4- Vijimi i procedurave të prishjes së detyruar të 7 pallateve të ndodhura në njësitë administrative Sukth dhe Manëz , të gjitha pronë private, në zbatim të ekspertizave të thelluara të hartuara nga Instituti i Ndërtimit Tiranë.
Bo.Ba/fjala.al
