Përtej përpjekjeve dhe deklaratave optimiste për të mos u dorëzuar, Kukësi duket se e ka humbur betejën për titull me Tiranën dhe kësisoj, verilindorët e shikojnë Kupën e Shqipërisë si të vetmen mundësi reale për të mos mbetur pa trofe këtë sezon. Dhe pengesa e parë e skuadrës së drejtuar nga trajneri Orges Shehi do të jetë Teuta, të cilën shorti i së premtes ia vendosi përballë në gjysmëfinale.
Dhe, duke folur menjëherë për mediat pas hedhjes së shortit të gjysmëfinaleve të veprimtarisë së dytë të futbollit në vend, drejtori sportiv i Kukësit, Nderim Nexhipi, e vlerësoi lart kundërshtarin e radhës, Teutën, por ngurroi të fliste për një finale të mundshme kundër Tiranës. “Tani këtë fazë gjysmëfinale, nuk ka short të lehtë, të gjitha ekipet kanë cilësi”, – deklaroi nr. 2 i klubit verilindor.
“Jemi kundër Teutës, dy ndeshje, shpresojmë të bëjmë më të mirën, – ka vijuar ai. – Tani, normalisht ne çdo vit futemi në garë për titull. Tirana është shkëputur, pavarësisht se jemi ende në garë matematikisht, është shumë e vështirë. Kështu që synojmë Kupën që të plotësojmë sado pak sezonin tonë.” Zyrtari i Kukësit nuk ka pranuar ta nënvlerësojë skuadrën bregdetare.
“Jo, nuk jemi më superiorë se Teuta, – ka këmbëngulur ai. – Ndeshjet kundër Durrësit çdo vit janë të vështira. Teuta ka lojtarë me shumë cilësi dhe do të jenë dy ndeshje shumë interesante. Presidenti nuk e ka thënë një gjë të tillë, që të fokusohemi vetëm te Kupa. Sidoqoftë, për ekipin tonë, Kupa e Shqipërisë do të jetë një trofe shtesë.”
“Si vitin e shkuar, dhe këtë vit duam ta ngremë trofeun”, – shtoi drejtuesi i klubit fitues në fuqi të kësaj veprimtarie. “Duhet kaluar Teuta për të folur për finalen, – ka theksuar Nexhipi, i pyetur për një finale të mundshme me finalen. – Normalisht, Kukësi dhe Tirana kanë dy skuadra të mira dhe do të ishte një finale e fortë. Kemi dy ndeshje, si ne si ata, kështu që të presim si do të shkojnë gjërat”./Bl.Ba/Fjala.al
