Edhe pse për titullin do të duhet një “harakiri” e dy ekipeve të kreut, Inter nuk e ka lënë pas ëndrrën e madhe për kampionatin, por mori një fitore që si zakonisht në ndeshjet e zikaltërve, i bën tifozët “me aritmi”. Pikërisht kur dukej se armata e trajnerit Antonio Conte do të vuante një disfatë që edhe mund të vendoste kualifikimin në Champions në rrezik, ekipi mik shënon dy gola në harkun e vetëm 3 minutave, një përmbysje e çmendur që i jep suksesin 1-2 në dëm të Parmës.
Por çfarë ndodhi pak a shumë në stadiumin “Tardini”… E nisën gjithçka më mirë padronët e shtëpisë që arritën edhe të prishin ekuilibrat me një gol të bukur të sulmuesit Gervinho pas vetëm 15 minutash. Zikaltërit ishin të ngadaltë dhe me lojë të lexueshme për shumicën e sfidës, por kur askush nuk e priste, finalizuan përmbysjen e madhe.
Kartoni i kuq i Kucka dhe dy goditje me kokë i dhanë Interit fitoren, fillimisht me holandezin De Vrij, dhe më pas me Bastoni. Kështu në javën e 28 Inter blondon kualifikimin në Champions League, dhe shkon 13 pikë më shumë se Roma e vendit të pestë.
