Drejtoresha e Teatrit Kombëtar të Operas dhe Baletit, Zana Çela, ka shprehur ngushellimet e saj për ndarjen nga jeta të Mjeshtrit të madh të valleve popullore Besim Zekthi.
Përpos fjalëve të ndjera që ka shprehur në rrjetin social “Facebook” lidhur me humbjen e madhe që ka pësuar Shqipëria , Çela ka kujtuar në një mënyrë të veçantë Mjeshtrin e madh me disa foto të rralla.
Në këtë foto ilustrohet karriera e të madhit Zekthi, jeta e tij artistike lidhur ngushtë me Ansamblin e Popullor të Këngëve dhe Valleve shqiptare.
Postimi i plotë i Zana Çelës
ARTI SHQIPTAR ËSHTË SOT NË ZI!
Shuhet emblema e Ansamblit Popullor të Këngëve dhe Valleve Popullore – “Nderi i Kombit” – BESIM ZEKTHI.
Nga viti 1957 deri në vitin 1990, “Mjeshtri i madh” – Besim Zekthi interpretoi në mbi 200 valle si solist, duke realizuar me qindra figura artistike, të cilat janë të fotografuara në memorien artistike të gjithë adhuruesve të tij, në mbarë brezat shqiptarë. Karriera e tij shënon kulme suksesi jo vetëm në trevat shqiptare, por anekënd botës, ku me Ansamblin Popullor të Këngëve e Valleve, Besiz Zekthi “i dha zë e shpirt” valles dhe muzikës tone tradicionale.
“Vallja e shqipeve” dhe “Festë të madhe ka sot Shqipëria”, qe ai i gdhendi në fizikun e tij, magjepsi francezet ne Festivalin e Dizhonit dhe kurorezoi Ansamblin tone Popullor me Gjerdanin e Arte.
Jeta e tij artistike është e lidhur fort me jetën artisike të Ansamblit të Këngëve dhe Valleve Popullore, jo vetëm si valltar, por dhe koreograf një seri vallesh janë krijuar prej tij dhe sot interpretohen me sukses nga artistët e AKVP, si pjesë e fondit të artë të trashëgimisë tone kulturore. Ndër to mund të përmendim: “Valle me motive të Lapardhasë”, “Valle e Librazhdit”, “Valle e Shengjergjit”, “Valle e Leskovikut”, “Valle me motive të Çermenikës”, “Valle e Konispolit”, “Valle labe”, “Valle e Kuksit”, “Valle me motive të Prizrenit”, “Valle me motive të Krujës”, “Për flamur, për atdhe”, “ Dasma e Rugovës”, “Valle me motive të Drenicës”, “Gju më gju me popullin”, “Valle mzeqare”, “Vjelja e mollëve”, etj.
Në Nentor te vitit 2017 me rastin e 60-vjetorit te Ansamblit Popullor te Kengeve e Valleve, për të gjithë kontributin e tij artistik, në më shumë se 30 vjet në Ansamblin Popullor të Këngëve dhe Valleve, Besim Zekthi u dekorua nga Presidenti i Republikës z. Ilir Meta, me titullin me te larte “Nderi i Kombit”
Ylli i Ansamblit Popullor, kërcimtari , koreografi dhe mjeshtri i valles popullore shqiptare, Besim Zekthi, u vlerësua me motivacionin për kontributin shumëvjeçar si solist me nivel të lartë interpretative dhe mjeshtëri të veçantë artistike të valleve shqiptare, për pasurimin e fondit të krijimtarisë koreografike dhe përçimin tek brezat e artistëve të rinj, si dhe për promovimin denjësisht të vlerave të mirëfillta të trashëgimisë kulturore shqiptare në gjithë botën.
/Ra.My. Fjala.al/
